कावासोतीमा मर्चरी सेवा (शव सुरक्षित राख्ने फ्रिज) संचालनमा

कावासोती- नेपाल रेडक्रस सोसाइटी कावासोती उपशाखाले मर्चरी चेम्बर सेवा (शव सुरक्षित राख्ने फ्रिज) संचालनमा ल्याएको छ ।

पछिल्लो समय पारिवारका सदस्यहरु टाढा रहेका कारण कोही आफन्त गुमाउदा तुरुन्त अन्त्यष्टि गर्न नसकिने अवस्थालाई मध्यनजर गर्दै शवलाई सुरक्षित राख्नको लागि मर्चरी चेम्बर (Dead Body Freezer Box) संचालनमा ल्याईएको उपशाखाले पत्रकार सम्मेलन गरी जानकारी गराएको हो ।

कोही आफन्त गुमाउँदा तुरुन्त अन्त्येष्टि गर्न नसकिने, धार्मिक वा अन्य कारणले गर्दा शवलाई केही समयसम्म सुरक्षित राख्नुपर्ने अवस्थामा घरमै शवलाई व्यवस्थित रूपमा राख्न सक्ने मर्चरी चेम्बर (Dead Body Freezer Box) संचालनमा ल्याएको नेपाल रेडक्रस सोसाइटी कावासोती उपशाखाका सभापती बाबुराम कंडेलले बताउनुभयो ।

यस चेम्बरको प्रयोगबाट शवहरूलाई उचित तापक्रममा सुरक्षित रूपमा राख्न सकिन्छ । जसले मृतकका परिवारलाई आवश्यक प्रक्रियाहरू पूरा गर्न समय दिन मद्दत गर्ने सभापती कंडेलले बताउनुभयो ।

यो सेवा यस क्षेत्रमा पहिलो भएको हुँदा यसबाट धेरै नागरिकलाई राहत मिल्ने विश्वास लिईएको छ । प्रति मर्चरी चेम्बर २ लाख २५ हजार लागतमा दुई वटा चेम्बर संचालनमा ल्याईएको छ ।

कावासोती उपशाखा क्षेत्र भित्र रहेका नागरिकहरुका लागि मर्चरी चेम्बरको प्रयोग गर्नको लागि दिनको पन्घ्र सय र उपशाखाको कार्यक्षेत्र बाहेक अन्य क्षेत्रका लागि दुई हजार व्यवस्थापन खर्च लाग्ने कंडेलले बताउनुभयो ।

नेपाल रेडक्रस सोसाइटी कावासोती उपशाखाले समाजसेवा तथा मानवताको सेवामा अतुलनीय योगदान दिँदै रक्तसञ्चार सेवा, उद्धार तथा राहत कार्य, एम्बुलेन्स सेवा, शव बहान सेवा, स्वास्थ्य सचेतना कार्यक्रम तथा विभिन्न सामाजिक सेवाहरू उपलब्ध गराउँदै आएको छ ।