सङ्खुवासभाको  चैनपुरमा दुई वटा शङ्कास्पद वस्तु फेला 

सङ्खुवासभा – सङ्खुवासभाको चैनपुर नगरपालिका–६ मा दुई वटा शङ्कास्पद वस्तु फेला परेको छ । सोमबार बिहान इलाका प्रहरी कार्यालय चैनपुर नजिकै रहेको पार्क सरसफाइ गर्ने क्रममा दुई वटा शङ्कास्पद वस्तु फेला परेको हो । इलाका प्रहरी कार्यालय नजिकै चैनपुर–६  दुई वटा शङ्कास्पद वस्तु फेला परेको जिल्ला प्रहरी कार्यालय सङ्खुवासभाका प्रहरी नायव उपरीक्षक दक्ष कुमार बस्नेतले जानकारी दिनुभयो ।

चैनपुरको बसपार्क भन्दा माथि नगरपालिका कर्मचारी र  प्रहरी सहितको टोली सरसफाइ गर्ने क्रममा बाटोको बाँयापट्टी तारसहित जमिनमा गाडिएको अवस्थामा दुई स्थानमा शङ्कास्पद वस्तु फेला पारेको प्रहरी नायव उपरीक्षक बस्नेतले बताउनुभयो । उक्त दुई वटा शङ्कास्पद वस्तु फेला परेको ठाउँ द्धन्द्धकाल सशस्त्र प्रहरी बल अरुण गुल्म रहेको थियो । शङ्कास्पद वस्तु बम रहेको आशङ्कामा नेपाली सेनाको बम डिस्पोजल टोली घटनास्थल तर्फ लागेको छ । उक्त क्षेत्रमा बेला बेला द्धन्द्धकालमा राखिएका विस्फोट पदार्थ बेला पर्ने गरेको छ । तत्कालीन समयमा सुरक्षा बेस क्याम्प रहेकाले बम हो कि भन्ने आशङ्का रहेको प्रहरीले जनाएको छ ।