गाउँ नै जुटे केरा खेतीमा

स्याङ्जा –  गरे के हुँदैन भन्ने उदाहरणको रूपमा स्याङ्जाको कालिगण्डकी ५ बास्टारीका सबै किसानहरू केरा खेतीतर्फ आकर्षित भएका छन् । पछिल्लो समय जिल्लामा सबैभन्दा धेरै केरा खेती उत्पादन एवम् विक्री गरेर बास्टारी गाउँ नै केरा खेतीले चिनिने गरेको छ । छोटो समयमै मनग्य आम्दानी र बजारीकरणको कुनै समस्या नरहेकोले गाउँ नै केरा खेतीमा लागेका हुनु ।

स्याङ्जाको कालिगण्डकी गाउँपालिका ५ बास्टारी गाउँका स्थानीय पछिल्लो समय केरा खेतीमै रमाएका छन् । बि.सं २०३७ सालमा प्रेम नारायण गौडेलले सुरु गरेको केरा खेतीबाट प्रभावित भएर अहिले सिङ्गो गाउँका किसानहरू छोटो समयमै मनग्य आम्दानी गरेका छन् । तर सरोकारवालाहरूले विकासको नाममा गाउँसम्म जाने बाटोको मर्मत सुधार कालोपत्रे नगर्दा बर्षायाममा सवारीसाधन नचल्ने भएकोले उत्पादित खेरा बजारसम्म लान निकै समस्या भएको कृषक बताउँछन् ।

केरामा सबैभन्दा राम्रो झापाली माल भोक नामक केरा मानिन्छ । यसको फल राम्रो लाग्ने, बिरुवा लगाएको १६ महिना देखी नै उत्पादन दिने गर्दछ । मौसममा फल्ने भएका कारण किसानहरू यही जातको केरा लगाउन थालेका हुनु । स्वास्थ्यका हिसाबले अन्य केरा भन्दा राम्रो मानिन्छ । तयारी केरा किसानले ७० रुपैयाँ दर्जनमा बिक्री गर्दै आएका छन् । बास्टारी गाउँमा मात्रै अहिले तिन सय रोपनी जग्गामा केरा खेती हुँदै आएको छ । किसानले केरा बिक्रीबाट वार्षिक १५ देखि २० लाखसम्म आम्दानी गर्दै आएका छन् । उत्साहजनक उत्पादनमा हौसिएका किसानलाई बजारीकरणको समस्या समाधानका लागी समेत स्थानीय तहले काम अगाडि बढाएको वडा अध्यक्ष रुक बहादुर थापा बताउनुहुन्छ ।

पछिल्लो समय अवसरको खोजीमा युवा पलायन हुने क्रम बढ्दै गर्दा बास्टारीका स्थानीयले भने देखाएको अभ्यास निकै स्वागत योग्य छ । देशमै केही गरौँ भन्ने मनसायले कृषिमा रमाएका स्थानीयलाई सरकारी क्षेत्र वाटै उन्नत जातका भूगोल अनुसारको केरा र उत्पादन भएको केराको बजारीकरणको व्यवस्था हुन सके वार्षिक करोडौँको आयात हुने केरामा अवश्य कमी आउने सुनिश्चित छ ।