तीनकुनेको घटना नियोजित र गणतन्त्र उल्ट्याउने नियतमा भएको थियो- गृहमन्त्री

काठमाडौँ- शान्तिपूर्ण कार्यक्रम गर्ने भन्दै अनुमति मागेर पूर्वराजका समर्थकहरुले चैत १५ गते तीनकुनेमा नियोजित रुपमा आपराधिक गतिविधि गरेको गृहमन्त्री रमेश लेखकले बताउनुभएको छ ।

राज्य व्यवस्था तथा सुसाशन समितिको आजको बैठकमा तीनकुने घटनाबारे जानकारी गराउँदै गृहमन्त्री लेखकले सो घटना संघीय लोकतान्त्रिक गणतन्त्र उल्टाउने नियतले नियोजित रुपमा गराइएको जिकिर गर्नुभयो ।

गृहमन्त्री लेखकको चैत १५ को घटना संविधानलाई उल्ट्याउने नियतले गरिएकोमा कुने दुविधा नभएको भन्दै वर्तमान व्यवस्थालाई उल्ट्याउने नियतले गरिएको आन्दोलन क्षम्य नहुने बताउनुभयो ।

घटनाको निष्पक्ष र स्वतन्त्र अनुसन्धानका लागि नेपाल प्रहरीलाई निर्देशन दिइएको र अनुसन्धान जारी रहेको पनि उहाँको भनाइ थियो ।

गृहमन्त्री लेखकले सरकारले तीनकुने घटनामा ज्यान गुमाएका एक पत्रकारसहित दुई जनालाई १०-१० लाख रुपैयाँ क्षतिपूर्ति उपलब्ध गराउने निर्णय गरिसकेको जानकारी दिनुभयो ।

आन्दोलनमा घाइते भएकाहरुको उपचार सरकारले निःशुल्क गराउने पनि गृहमन्त्रीले समितिलाई जानकारी गराउनुभयो ।।