परीक्षा गर्ने वा नगर्ने भन्ने विषयमा प्रधानमन्त्रीसँग बोर्डका पदाधिकारीहरुको छलफल जारी
काठमाडौँ- शिक्षकहरुको आन्दोलनका कारण यतिखेर कक्षा १२ को परीक्षा अन्यौलमा परेको छ ।
पर्सि बैशाख ११ गतेबाट कक्षा १२ को परीक्षा हुँदैछ । तर आजसम्म राष्ट्रिय परीक्षा बोर्डले केन्द्राध्यक्षको टुंगो लगाउन सकको छैन । किनभने केन्द्राध्यक्ष भएका शिक्षकहरु नै आन्दोलनमा छन ।
शिक्षकहरु माग पूरा नभएसम्म परीक्षामा सहभागी नहुने अडानमा छन । यसले बोर्डको परीक्षा कार्यक्रम प्रभावित मात्र भएको छैन परीक्षा हुने कि नहुने भन्ने अन्यौल विद्यार्थी र आम अभिभावकहरुमा परेको छ।
परीक्षा नलिने शिक्षकहरुको अडान हुँदाहुँदै पनि राष्ट्रिय परीक्षा बोर्डले आज दिउँसो जसरी पनि परीक्षा संचालन गर्ने निर्णय गर्यो । त्यसपछि आएका क्रिया प्रतिक्रियाहरुले परीक्षालाई अझ अन्यौल बनाइदिएको छ ।
निजामती कर्मचारी खटाएरै भएपनि परीक्षा सञ्चालन गर्ने बोर्डको निर्णयलाई शिक्षकहरुले चुनौति दिएका छन । अर्कोतिर, निजामती कर्मचारी युनियनहरुले पनि बोर्डको निर्णयलाई स्वीकार गरेका छैनन । बरु उनीहरु पनि शिक्षककै पक्षमा देखिन्छन ।
अब करिब ४८ घण्ट मात्र बाँकी हुँदा देखिएको यो अनिश्चयले परीक्षामा सहभागी हुने विद्यार्थी र अभिभावकहरुलाई थप चिन्ता थपिदिएको छ।
विद्यार्थीहरु तयारी त गरिरहेका छन तर परीक्षा हुने वा नहुने भन्ने विषयले उनीहरुको एकाग्रता नै भंग गरिदिएको कतिपयको बुझाइ छ ।
यस्तो अबस्थाम यतिखेर बोर्डका पदाधिकारी र शिक्षा मन्त्रालयका पदाधिकारीहरु प्रधानमन्त्रीसँग छलफलमा छन ।
प्रधानमन्त्री निवास वालुवाटारमा भइरहेको छलफलमा बोर्डका अध्यक्ष डा महाश्रम शर्मासहतिका पदाधिकारीहरु छन ।
आज अबेरसम्म भने पनि परीक्षाको विषयमा सूचना आउने सम्भावना रहेको वोर्डका एक सदस्यले जानकारी दिएका छन।।
प्रतिक्रिया राख्नुहोस्