रारा गोल्ड कप ः तेस्रो खेलमा सलहेश र बिर्तामोड भिड्दै

धनकुटा-  धनकुटाको राजा रानीमा जारी रारा गोल्ड कप फुटबल प्रतियोगिताको १२ औँ संस्करणमा बुधवार तेस्रो खेल हुंदैछ। बुधवार हुने तेस्रो खेलमा साबिक विजेता सलहेश फुटबल क्लब सिराहा र बिर्तामोड युनाइटेड क्लब झापा बिच हुँदै छ। खेल दिउँसो साढे ३ बजेपछि राजा रानीस्थित पुण्य मा बिको खेलमैदान हुनेछ। यसअघि मङ्गलवार भएको  प्रतियोगिताको दोस्रो खेलमा मोरङको एलएक्स सिटी फुटबल क्लबले धनकुटाको डाँडा बजार फुटबल क्लबलाई ० का विरुद्ध २ गोलले पराजित गरेको थियो भने सोमबार सम्पन्न पहिलो खेलमा आयोजक रारा फुटबल क्लबलाई ० का विरुद्ध ४ गोल अन्तरले हराउँदै गोल्डेन स्टार फुटबल क्लब सुनसरी विजयी भएको थियो। विजयी भएसँगै गोल्डेन स्टार र एलएक्स सिटी सेमिफाइनलमा प्रवेश गरेका छन् भने बुधवारको खेलको विजेता पनि सेमिफाइनलमा प्रवेश गर्नेछ।

प्रतियोगिता अन्तरगत बिहीबार पहिलो चरणको अन्तिम खेल ए डिभिजन लिग विजेता चर्च ब्वाइज युनाइटेड क्लब काठमाडौँ र बागमती यूथ क्लब सर्लाही बिच हुने आयोजकले जनाएको छ।

आगामी जेठ ४ गतेसम्म सञ्चालन हुने प्रतियोगिताको विजेताले नगद ७ लाख रुपैयाँ र उपविजेतालाई नगद ३ लाख रुपैयाँ हात पार्ने आयोजक रारा फुटबल क्लबका अध्यक्ष मणि चेम्जोङले जानकारी दिनुभयो। प्रतियोगितामा सबैभन्दा बढी गोल गर्ने र सबै विधाका सर्वोत्कृष्ट खेलाडीलाई पुरस्कारको व्यवस्था गरिएको आयोजकले जनाएको छ। धनकुटाको प्रतिष्ठित प्रतियोगिता मानिने रारा गोल्ड कप ०५८ सालबाट सुरु भएको हो।