रुपान्तरण वहस: विषयवस्तुमा विशिष्टतासँगै प्रभाव र प्रवर्द्धनमा प्राथमिकता

काठमाडौँ- सार्वजनिक सेवा प्रसारण नेपालले आज ‘रुपान्तरण बहस’ कार्यक्रमको आयोजना गर्‍यो ।

सार्वजनिक सेवा प्रसारणमा विविधता, विशिष्टता, पहुँच, प्रभाव र प्रवर्द्धन’ विषयमा गरिएको रुपान्तरण वहसमा २ वटा सत्रमा छलफल भए ।

‘पिएसवी: प्रभाव र प्रवर्द्धन’ विषयक सत्रमा बक्ताहरुले जनताको चासोका विषयवस्तुलाई प्राथमिकता दिएर बजारमा प्रभाव र प्रबर्द्धन गर्नुपर्ने बताउनुभयो ।

उहाँहरुले तथ्याङ्कमा आधारित भएर श्रोता र दर्शकको बदलिँदो चाहनालाई सम्बोधन गर्न पनि सुझाव दिनुभयो ।

अहिले मिडियामा अस्वस्थ प्रतिस्पर्धा देखिएकाले  जनचासोको विषय छायाँमा परेको भन्दै विज्ञहरुले समयको माग, जनताको  आवश्यकता, सबै वर्गको विषय उठान जरुरी रहेको छ, भन्नुभयो ।

नेपाल विज्ञापन एजेन्सी संघका प्रथम उपाध्यक्ष उजय शाक्यले टेलिभिजन र रेडियोमार्फत दिइने सामाग्री तथ्याङ्कसहित जनचासोको विषय रहनु पर्नेमा जोड दिनुभयो ।

कोकाकला बहुराष्ट्रिय कम्पनीका बजार परामर्शदाता आस्रा भट्टराईले  कुन उमेर समुदायले कस्तो कार्यक्रम समाचारको समाग्री हेर्न वा सुन्न चाहान्छन् त्यसको अध्ययन गरी अघि बढ्न सुझाव दिनुभयो ।

बहुराष्ट्रिय कम्पनी डावरका बजार प्रमुख अभय गोर्खालीले जनचाहाना अनुरुपका सामग्रीले बजारमा अझै राम्रो प्रभाव पर्ने सुझाव दिनुभयो ।

सार्वजनिक सेवा प्रसारण नेपालका संचालक समिति सदस्य फूलमान बल तामाङले समयको आवश्यकता  अनरुप पिएसबीको सामाग्रीहरु उत्पादन गर्ने उदेश्य रहेको बताउनुभयो ।

संचालक समिति सदस्य अनिता गुरुङले हालका समाचार तथा कार्यक्रमका सामग्रीहरुलाई परिमार्जन गर्दै अगाडि बढ्नुपर्ने बताउनुभयो ।

कार्यक्रमका सहभागी विज्ञहरुले नाफामुखी निजी संचारगृह भन्दा अलि फरक ढङ्गले पिएसबी जानुपर्ने सुझाव समेत दिनु भएको थियो ।

यसैगरी, कार्यक्रमको दोस्रो सत्रमा भएको ‘सार्वजनिक सेवा प्रसारण: विषयवस्तुमा विशिष्टता’ शिर्षकको छलफलमा त्रिभुवन विश्वविद्यालय आमसञ्चार तथा पत्रकारिता केन्द्रीय विभाग प्रमुख डा कुन्दन अर्यालले पहिलेको तुलनामा पिएसवी पछि नीतिमा स्पष्टताआएको भएपनि अनुसन्धान निकाय , कार्यक्रमको निर्देशिका बनाएर अघि बढ्दा नतिजामुखी हुने सल्लाह दिनुभयो ।

आमसञ्चार विज्ञ रघु मैनालीले रेडियो नेपाल र नेपाल टेलिभिजनबाट हाल प्रसारण भइरहेका सामाग्री आमनागरिकमैत्री प्रारुपमा नभएकोले प्रष्ट सन्देश दिएर माध्यमहरुको गुमिरहेको साख बचाउने गरी काम गर्नुपर्ने बताउनुभयो ।

लैङ्गिक समानता र समावेशी विज्ञ भारती सिलवाल गिरीले पिएसवीको प्रारम्भ लैङ्गिक समानता र समावेशीकरणमा रुपान्तरणका लागि अवसर भएको बताउँदै जनताले भोग्नु परेका भेदभाव, छुवाछुत, अन्याय, हिंसा लगायतका विषयमा ध्यान दिनुपर्ने बताउनुभयो ।

पिएसवी सञ्चालक समितिका सदस्य डा भूमिराज चापागाईँले विज्ञहरुको सुझावसँगै दर्शक र श्रोतालाई ध्यानमा राखेर सर्वेक्षणका माध्यमबाट प्राप्त तथ्याङ्कका आधारमा भावी कार्यक्रमहरु निर्माण गरी अघि बढ्ने प्रतिवद्धता जनाउनुभयो ।।