संविधान विरोधी कार्य कुनैपनि हालतमा सह्य हुँदैन : प्रवक्ता गुरुङ

काठमाडौँ- सञ्चार तथा सूचना प्रविधि मन्त्री पृथ्वीसुब्बा गुरुङले संविधान विरोधी कुनैपनि कार्यक्रम र गतिविधि सरकारलाई सह्य नहुने बताउनुभएको छ । संविधान विरोधी कार्य गर्नेलाई सरकारले कानूनी कारवाही गर्ने मन्त्री गुरुङको भनाइ थियो ।

जेठ ६ गते बसेको मन्त्रिपरिषद्को बैठकका निर्णयहरु सार्वजनिक गर्दै सरकारका प्रवक्तासमेत रहनु भएका मन्त्री गुरुङले राजा फर्काउने कुरा गर्नु नै संविधान विरोधी हुने भएकाले कसैलाई पनि यसतर्फ नलाग्न सचेत गराउनुभयो ।

गणतन्त्र स्थापनामा राजनीतिक दल र जनताले निक्कै ठुलो मुल्य चुकाएकाले पनि यसको रक्षाका लागि सत्तापक्ष र प्रतिपक्ष एक हुने मन्त्री गुरुङको भनाइ थियो ।

जेठ १५ गते गणतन्त्र स्थापना भएको दिनमा राजावादीहरुले आन्दोलनको चेतावनी दिएर सङ्घीय लोकतान्त्रिक गणतन्त्र र संविधानलाई चुनौती दिएको उहाँले बताउनु भयो ।

मन्त्रिपरिषद्का निर्णय सार्वजनिक गर्दै मन्त्री गुरुङले सरकारले उच्चस्तरीय आर्थिक सुधार सुझाव आयोग २०८१ को सुझाव कार्यान्वयनका लागि तयार गरिएको आर्थिक सुधार कार्यान्वयन कार्ययोजना-२०८२ लाई स्विकृत गरेको जानकारी दिनुभयो ।

मन्त्रिपरिषद्ले विभिन्न ९ वटा निर्णयहरु गरेको बताउँदै गुरुङले बाढीजन्य विपद् न्यूनिकरणका लागि आवश्यक पर्ने अस्थाई नदी नियन्त्रणको कार्य नेपाली सेनामार्फत गराउन स्विकृती प्रदान गरेको जानकारी दिनुभयो ।।