पूर्व राष्ट्रपति भण्डारी र चीनका गान्सु प्रान्तका गभर्नर रेन बीच भेटवार्ता
काठमाडौँ- चीन भ्रमणमा रहनुभएका पूर्व राष्ट्रपति विद्यादेवी भण्डारीसँग आज चीनको गान्सु प्रान्तस्थित डुनहाउङमा गान्सु प्रान्तको कम्युनिष्ट पार्टी कमिटीका डेपुटी सेक्रेटरी तथा गभर्नर रेन जेन्हे नेतृत्वको प्रतिनिधिमण्डलले भेटवार्ता गर्यो ।
त्यसबखत पूर्व राष्ट्रपति भण्डारीले चिनियाँ राष्ट्रपति सी ले सन् २०१९ मा गर्नुभएको नेपाल भ्रमण र सोही वर्ष राष्ट्रपतिको हैँसियतमा आफूले गरेको चीन भ्रमणमा भएका समझदारीहरुको स्मरण गर्दै विगतका सहमती कार्यान्वयनमा मिलेर काम गर्नुपर्ने उल्लेख गर्नुभयो ।
यसैगरी, गान्सु प्रदेश र नेपालबीच थप सहकार्य गर्न सकिने क्षेत्रहरुबारे पनि छलफल भयो ।
यसैगरी पूर्व राष्ट्रपति भण्डारी नेतृत्वको उच्चस्तरीय प्रतिनीधिमण्डलमा रहनुभएका उद्योग बाणिज्य तथा आपूर्ति दामोदर भण्डारी लगायतसँग गान्सुका स्थानीय उद्योगी व्यवसायीले छलफल गर्नुभयो ।
उहाँहरुबीच शिक्षा, स्वास्थ्य, पर्यटन, प्रविधि, कृषि जस्ता क्षेत्रमा लगानी प्रबर्द्धनका साथै ब्यापार घाटा घटाउने लगायतका विषयमा छलफल भयो ।
यसअघि पूर्व राष्ट्रपति भण्डारीले आजै डुनहाउङको मिङशा पर्वतमा अवस्थित मोगाओ ग्रोट्टसको अवलोकन गर्नुभयो ।
प्राचीन तथा मध्ययुगीन समयको व्यापारिक मार्गहरूको सञ्जाल सिल्क रोडको महत्वपूर्ण विश्राम विन्दुका रुपमा रहेको डुनहाउङ विविध सभ्यताको संगम भएको ऐतिहासिक स्थल हो ।
विविध संस्कृतिको विरासत बोकेको मोगाओलाई विश्वकै चम्किलो गहनाका रुपमा लिइन्छ ।
बौद्ध कलाको संरक्षणमा विश्वकै उत्कृष्ट स्थलका रुपमा रहेको मोगाओ ग्रोट्टसमा ऐतिहासिक महत्वका गुफाहरु पनि रहेका छन् ।
भ्रमणका क्रममा पूर्व राष्ट्रपति भण्डारीले ऐतिहासिक महत्वका सांस्कृतिक धरोहरबारे जानकारी लिनुभयो ।।
प्रतिक्रिया राख्नुहोस्