राजतन्त्र कहिल्यै आउँदैन, आन्दोलन बेकार हो : सभापति देउवा

जनकपुरधाम- नेपाली कांग्रेसका सभापति एवं पूर्वप्रधानमन्त्री शेरबहादुर देउवाले नेपालमा राजावादीहरुले गरेको आन्दोलनको कुनै अर्थ नरहेको बताउनुभएको छ ।

जनकपुरधामस्थित विमानस्थलमा आज पत्रकारहरुसँग संक्षिप्त कुराकानी गर्दै सभापति देउवाले राजतन्त्र कहिलै नआउँने र त्यसको पक्षमा आन्दोलन गर्नु बेकार भएको उल्लेख गर्नुभयो ।

वर्तमान गठबन्धनको सरकारले आफ्नो पार्टीको सहमति अनुसार कार्य गरिरहको उल्लेख गर्दै सभापति देउवाले अहिलेको सरकारले ल्याएको बजेटले सबै पक्षलाई समेटेको तथा सन्तुलित भएको बताउनुभयो ।

कांग्रेस र एमाले सम्मिलित वर्तमान सरकार आगामी निर्वाचन २०८४ सालसम्म कायम रहने र जथाभावी हल्लाको पछाडि नलाग्न उहाँले सबैलाई आग्रह गर्नुभयो ।

नेपाली कांग्रेसका नेता ठाकुरप्रसाद ढुङ्गानाको आज धनुषाधाममा आयोजित ६२ औँ स्मृतिसभा, शालिक अनावरण र उहाँका बारेमा लेखिएको पुस्तकको विमोचनसहितका कार्यक्रममा सहभागी हुन सभापति देउवा आज जनकपुरधाम जानुभएको हो ।।