बाढीले सयौँ रोपनी खेत बगरमा परिणत, लाखौँको मकै बाली नष्ट

रामेछाप –  अविरल वर्षाका कारण  रणजोर खोलामा आएको बाढीले खेत बगाउँदा  मन्थली बजार छेउको सयौँ रोपनी  खेत बगरमा परिणत भएको छ ।

बिहीबार दिउँसो देखी मध्यरात सम्म भएको अविरल वर्षाका कारण  खोलामा आएको बाढीले पाक्न लागेको  मकै बाली समेत नष्ट गरेको छ । भित्र्याउने बेलाको मकै बाली नष्ट भएपछि किसानहरू चिन्तित भएका छन् ।

वर्षा नलाग्दै खोलामा आएको बाढीले सयौँ रोपनी खेत बगरमा परिणत गरिदिएको मन्थली नगरपालिका वडा नं १ का किसान ध्रुव प्रसाद सुवेदीले बताउनु भयो । उहाँले बाढीले खेत बगाउनुका साथै पाक्न लागेको मकै बाली समेत नष्ट भएपछि किसानहरू चिन्तित भएको  जानकारी दिनु भयो ।  खोलामा अस्वाभाविक रूपमा आएको बाढीले रणजोर खोला किनारमा रहेको आफूहरूको खेत बगरमा परिणत गरिदिएको मन्थली १ का कुमार श्रेष्ठले बताउनु भयो । बाढीले खेत जोगाउनका लागि बनाइएको ठाउँ ठाउँको  तटबन्ध समेत बगाएको छ ।