चितवनको मेघौलीमा पर्यटक लक्षित गर्दै ‘सिद्धार्थ वाइल्डलाइफ रिट्रिट’ सञ्चालनमा

चितवन – पछिल्लो समय वाइल्डलाइफ टुरिजममा हाइ-एन्ड पर्यटकलाई आकर्षित गर्न सफल चितवनको मेघौलीमा नेपाली हस्पिटालिटी चेनको अग्रणी सिद्धार्थ हस्पिटालिटीले लग्जरी वाइल्डलाइफ रिसोर्ट सञ्चालनमा ल्याएको छ ।

यसअघि साराङ वाइल्डलाइफ स्याङचुरीका नाममा सञ्चालनमा रहेको रिसोर्टलाई सिद्धार्थ ग्रुपले  ‘सिद्धार्थ वाइल्डलाइफ रिट्रिट’का नाममा सञ्चालन गरेको सिद्धार्थ बिजनेस ग्रुपका प्रमुख कार्यकारी अधिकृत (सिइओ) कृष्ण न्यौपानेले जानकारी दिनुभयो ।

“वाइल्डलाइफ टुरिजमका लागि देशकै उत्कृष्ट गन्तव्य  मेघौलीमा प्रकृतिमा रमाउँदै जलचर, वन्यजन्तु र चराचुरुङ्गी अवलोकन गर्न चाहनेका लागि नेपालकै उत्कृष्ट गन्तव्य हो”, न्यौपानेले भने, “यति सुन्दर गन्तव्य मेघौलीमा पर्यटकलाई उच्चस्तरीय वाइल्डलाइफ रिसोर्टको सेवा दिने उद्देश्यले सिद्धार्थ ग्रुप मेघौली आएको हो ।”

चितवनको भरतपुर विमानस्थलबाट करिब ३० किलोमिटर दक्षिण-पश्चिममा पर्ने मेघौलीसम्म पुग्नका लागि कालोपत्रे सडकको सुविधा छ ।

सिइओ न्यौपानेका अनुसार सिद्धार्थ वाइल्डलाइफ रिट्रिट १२ बिघा क्षेत्रको जङ्गलमा छ । रिसोर्टभित्रै छुट्टै आनन्दको संसार जस्तो महसुस हुने सुन्दर बगैँचासहित रिसोर्ट परिसरकै जङ्गलमा विभिन्न चराचुरुङ्गी र जनावरको अवलोकन गर्न सकिन्छ । रिसोर्ट परिसरबाट बग्ने खोलाले त्यहाँको प्राकृतिक सुन्दरतामा थप मिठास भरेको छ ।

यस रिसोर्टको अर्को आकर्षण उत्कृष्ट स्विमिङ पुल पनि हो । पुलसँगै पुल साइड बार सञ्चालनमा छ । स्विमिङको थकान मेट्न पुलसँगै रहेको झुल्ने खटियामा ढल्केर सुस्ताउनुमा बेग्लै मज्जा हुन्छ ।

पाहुनाले रिसोर्टमा रहेका हात्तीलाई घाँस, दाना खुवाउने, हात्तीसँगै बगैँचा घुम्ने, हात्ती बाथ, हात्ती वाक, हात्तीलाई खुवाउँदै आफू पनि ब्रेकफास्ट (Breakfast with elephant) गर्ने जस्ता रोमाञ्चक सुविधा लिन सक्छन् । एउटा छावासहित रिसोर्टमा तीन वटा हात्ती पालिएका छन् ।

रिसोर्टमा स्थानीय रहनसहनअनुसार थारु शैलीका १७ भिल्ला बनाइएको छ, जसका २४ कोठामा  ४८ जना पर्यटकले रात बिताउन सक्छन् । सबै भिल्लाहरु डिलक्स भएको बताउँदै सिइओ न्यौपानेले जङ्गल रिसोर्टमा हुनुपर्ने न्यूनतमदेखि अधिकतम सेवा–सुविधा उपलब्ध गराएको जानकारी दिनुभयो ।

चितवन राष्ट्रिय निकुञ्जको पश्चिम सिमानामा रहेको मध्यवर्ती जंगलसंगै जोडिएको रिसोर्टले जंगलभित्रको आवासको अनुभूति दिलाउँछ । आन्तरिक तथा बाह्य पाहुनाका लागि जंगल गतिविधि बाहेक विभिन्न प्याकेज उपलब्ध भएको न्यौपानेले बाताए ।

मेघौली विभिन्न प्रजातिको चराचुरुङ्गी अध्ययन तथा अवलोकन गर्नका लागि पनि उपयुक्त गन्तव्य हो । यहाँ साढे पाँच सयभन्दा बढी प्रजातिका चरा पाइन्छन् ।

थारु र कुमाल समुदायको बाहुल्य रहेको मेघौलीमा राप्ती नदीमा डुङ्गामा सयर गर्दै गोलाघाट पुगेर सूर्यास्तको मनमोहक दृश्यावलोकन समेत गर्न सकिन्छ । निकुञ्जको किनार हुँदै कलकल बग्ने राप्ती नदी अनि सोही नदीमा डुङ्गा सयर गर्दै विभिन्न प्रजातिका चरा र जंगली जनावर हेर्ने सुविधाले जोकोहीलाई पुलकित बनाउँछ । डुङ्गा सयरपछि पुगिने गोलाघाट बाट देखिने सूर्यास्तले मोहित न बनाउने कोही  हुँदैन ।

पर्यटकहरु पूरा दिन वा आधा दिनको बुकिङ गरेर जँगल सफारीमा जान सक्छन् । आरामदायी हाइलक्स जिप र अनुभवी गाइडसँगै गरिने सफारीले जंगल सफारीको अनुभवलाई उत्कृष्ट बनाइदिन्छ ।

सिद्धार्थ हस्पिटालिटीअन्तर्गत हाल विभिन्न ब्राण्डमा मुलुकभर ३० भन्दा बढी आउटलेट सञ्चालनमा छन् । जसमा पाँच तारे स्तरको सिद्धार्थ भिलासा, चार तारे स्तरमा सिद्धार्थ वैभव, तीन तारे स्तरमा सिद्धार्थ बाटिकाका साथै सिद्धार्थ कटेज, एसक्याफे ब्राण्डलगायत सञ्चालनमा छन् ।