काभ्रेमा अनलाइन सट्टाबाजीमा संलग्न ५ जना पक्राउ

 काभ्रे – काभ्रेपलान्चोकको मण्डनदेउपुर नगरपालिका–७ स्थित एक रिसोर्टमा अनलाइन सट्टाबाजी सञ्चालन भइरहेको सूचनाको आधारमा प्रहरीले छापा मारी पाँच जनालाई पक्राउ गरेको छ।

जिल्ला प्रहरी कार्यालय धुलिखेलका अनुसार, सोमबार दिउँसो करिब २:३० बजे ‘नाल्दुम भिलेज रिसोर्ट एण्ड ग्रिन पिस रेस्टुरेन्ट’ मा छापा मारिएको थियो। घटनास्थलबाट ५ थान ल्यापटप र १८ थान मोबाइल फोन बरामद गरिएको छ, जुन अनलाइन जुवा खेल्न प्रयोग गरिएको बताइएको छ।

पक्राउ पर्नेहरूमा भक्तपुर र काठमाडौँका २४ देखि ३२ वर्ष उमेर समूहका दिगज नकर्मी, सञ्जीव कुशी, रोशन प्रजापति, एलिस कुश्म र रोजन महर्जन रहेका छन्। जिल्ला प्रहरी कार्यालय काभ्रेका डिएसपी मीनबहादुर घलेका अनुसार, उनीहरूमाथि थप अनुसन्धान भइरहेको छ।