रुकुमपूर्वको सदरमुकाम रुकुमकोट रहने सरकारको निर्णय

काठमाडौँ- सरकारले रुकुम पूर्वी जिल्लाको सदरमुकाम रुकुमकोट रहने निर्णय गरेको छ ।

मन्त्रिपरिषदको हिजो बसेको बैठकले गरेको निर्णय सार्वजनिक गर्न आयोजित पत्रकार सम्मेलनमा सरकारका प्रवक्ता एवं सञ्चार तथा सूचना प्रविधि मन्त्री पृथ्वी सुब्बा गुरुङले सो जानकारी दिनुभएको हो ।

बैठकले नेपाल स्काउट सम्बन्धी कानुनलाई संशोधन र एकिकरण गर्न बनेको विधेयक तर्जुमाको लागि सैद्धान्तिक स्वीकृति दिएको छ ।

त्यसैगरी विद्युत ट्रान्समिशन तथा वितरण आयोजना कार्यान्वयनका लागि नेपाल सरकारलाई प्राप्त हुने सय मिलियन अमेरिकी डलर ऋण स्वीकार गर्ने निर्णय गरेको छ ।

त्यस्तै जापानको ओसाकामा साउन १२ र १३ गते आयोजना हुने नेपाल दिवस कार्यक्रममा सहभागी हुन उद्योग तथा आपूर्ति मन्त्रालयका सचिव डा.रामप्रसाद घिमिरे नेतृत्वको टोलीलाई पठाउने निर्णय गरेको छ ।

बैठकले मलेसियामा आयोजना हुने नेपाल आदिवासी जनजाति महासङ्घ मलेसियाको चौथौ महाधिवेशनमा प्रमुख अतिथिको रूपमा सहभागी हुन कोशी प्रदेशका सांसद परशुराम खापुङलाई पठाउने निर्णय गरेको सरकारका प्रवक्ता मन्त्री गुरुङले जानकारी दिनुभयो।।