शिवनाथ मेलाबाट फर्किने क्रममा जीप दुर्घटना हुँदा एकको मृत्यु, चार घाइते

बैतडी- शिवनाथ धाममा लागेको मेलाबाट फर्किने क्रममा बैतडीको मेलौली नगरपालिका-७ स्वाखानीमा भएको जीप दुर्घटनामा एक जनाको मृत्यु भएको छ भने चार जना घाइते भएका छन् ।

से १ ज ७३२ नम्बरको बालेरो जीप दुर्घटनामा परी मृत्यु हुनेमा मेलौली नगरपालिका-२ दुर्गास्थाना स्वाडीकी २४ वर्षीया तुलसी पाण्डेय रहेको जिल्ला प्रहरी कार्यालय, बैतडीका इन्सपेक्टर बल्देब बडुले बताउनुभयो ।

उनको उपचारका क्रममा प्राथमिक स्वास्थ्य केन्द्र मेलौलीमा मृत्यु भएको हो ।

घाइते हुनेमा जीप चालक दरशथचन्द नगरपालिका– ७ सुर्कालका ३२ वर्षीय जनकराज बडु, मेलौली नगरपालिका- २ का ६५ वर्षीय डम्बर पाण्डेय, उनका ३४ वर्षीय छोरा हरि पाण्डेर र अर्का छोरा ओमप्रकास पाण्डेय रहेका छन् ।

जीप चालक बाहेक मृतक र घाइते सबै एकै परिवारका रहेको इन्सपेक्टर बडुले बताउनुभयो । घाइते गाडी चालक जनकराज बडु बाहेक अन्य तीन जनाको अवस्था सामान्य  मध्यम रहेको बुझिएको छ ।

चालक बडुको टाउकोमा चोट लागेको छ । घाइते सबैलाई डडेल्धुरा अस्पताल पठाइएको छ ।

जीप सडकबाट करिब १० मिटर तल खसेको इन्सपेक्टर बडुले बताउनुभयो ।।