स्थानीयको माग १५ दिनभित्र पूरा गर्ने प्रतिबद्धतासँगै बञ्चरेडाँडामा फोहोर फाल्न सुरु

काठमाडौँ- सहरी विकासमन्त्री कुलमान घिसिङले बञ्चरेडाँडा ल्याण्डफिल साइटका बासिन्दाका मागहरु १५ दिनभित्र माग पूरा गर्ने प्रतिबद्धता जनाएपछि हाललाई फोहर बिसर्जनको अवरोध हटेको छ ।

मन्त्री घिसिङको प्रतिबद्धतापछि स्थानीयले फोहोर फाल्न दिन सहमत भएका हुन। काठमाडौंको फोहोर विसर्जनस्थल बञ्चरेडाँडा पुगेर मन्त्री कुलमान घिसिङले आज स्थानीय बासिन्दा र जनप्रतिनिधिहरूसँग छलफल गरेर समझदारी जुटाएसँगै करिब एक सातादेखिको अबरोध हटेको छ ।

अहिलेसम्म निर्णय गरिएका र कार्यान्वयन हुन नसकेका सहमति कार्यान्वयन गर्ने बारेमा स्थानीय जनप्रतिनिधि र मन्त्री घिसिङवीच भएको सहमतिलाई सरोकारवाला पक्ष र मन्त्रालयका अधिकारीहरुले लिपिबद्ध बनाउने निर्णय भएको छ ।

१५ दिनभित्र गर्न सकिने कामका सूची सहरी विकास मन्त्रालयमा छलफल गरेर टुंगो लगाउने पनि सहमति भएको छ । त्यसका लागि मन्त्रालयमा वार्ता आजै हुने सरोकारवालाहरुले बताएका छन ।

सहमति भएसँगै स्थानीयको अवरोधका कारण विगत चार दिनदेखि सडमा रोकिएका फोहर बोकेका गाडीहरु ल्याण्डफिल्ड साइट तिर जान थालेका छन् ।

चार दिनसम्म फोहर फाल्न अवरोध हुँदा काठमाडौँका अधिकांश घर गल्लीमा फोहरको थुप्रो लागेको थियो । सडक दुर्गन्धित भएपछि महानगरपालिकाले केही दिनका लागि फोहोर घरबाट ननिकाल्न सूचना समेत जारी गरेको थियो ।।