अमेरिकामा ४३ दिन लामो सरकारको खर्चबिहिन अवस्थाको अन्त्य

 एजेन्सी –   अमेरिकी राष्ट्रपति डोनाल्ड ट्रम्पले इतिहासमै सबैभन्दा लामो सरकार सट-डाउनको अन्त्य गर्दै विधेयकमा हस्ताक्षर गर्नुभएको छ ।

अमेरिकाको इतिहासमा गत अक्टोबरमा १ खर्चसम्बन्धी विधेयक पारित नहुँदा सरकार ४३ दिन खर्च गर्न नपाउने अर्थात् सट-डाउनको अवस्थामा रहेको थियो ।

अमेरिकी संसदको तल्लो सदन हाउस अफ रेप्रिजेन्टेटिभ्समा केहीबेर अघि भएको मतदानमा ६ जना डेमोक्र्याट सांसदहरुले विधेयकको पक्षमा मतदान गरेका छन् ।

डेमोक्र्याट सांसदको सहयोगमा सोमबार सिनेटबाट पारित भएको विधेयक तल्लो सदनमा पनि डेमोक्र्याटहरुको सहयोगमा पारित भएको हो ।

मतदानमा विधेयकको पक्षमा २ सय २२ मत र विपक्षमा २ सय ९ मत परेको छ । सट- डाउनका कारण अमेरिकाका १४ लाख कर्मचारीले तलब नपाउने अवस्था आएको थियो । धेरै कर्मचारी बेतलबी बिदामा बसेका थिए भने कतिपयले बिना तलब काम गर्न बाध्य भएका थिए । सरकार खर्चबिहिन हुँदा हजारौं अमेरिकी उडान समेत प्रभावित भएका थिए ।।