नगरपालिकाबाट शिक्षकलाई स्थानीय भत्ता

खोटाङ – खोटाङस्थित हलेसी तुवाचुङ नगरपालिकाले शिक्षकलाई स्थानीय भत्ता दिने भएको छ । शिक्षक तथा कर्मचारीको लागि नेपाल सरकारको कार्यक्रम कार्यान्वयन कार्यविधि पुस्तिकाअनुसार कार्यपालिका बैठकबाट उक्त निर्णय पारित गरेको  हो ।

सो नगरपालिकाले चालु आर्थिक वर्षदेखि लागू हुने गरी शिक्षकलाई स्थानीय भत्ता दिने भएको हो । नगरपालिकाको १ सय ३६ औँ कार्यपालिका बैठकबाट स्थायी, स्वीकृत दरबन्दीमा कार्यरत अस्थायी÷करार र प्राविधिक धारमा कार्यरत प्रशिक्षक तथा सहायक प्रशिक्षकलाई स्थानीय भत्ता दिने निर्णय पारित गरिएको नगरप्रमुख विमला राईले जनाउनुभयो । स्थानीय भत्ता शिक्षकको तह अनुसार फरक–फरक हुने नगरप्रमुख राईको भनाई छ । नगरपालिकामा कार्यरत शिक्षकले चालु आर्थिक वर्षको साउन–१ गतेबाट लागू हुने गरी वर्षभरिमा साढे दश महिनाको स्थानीय भत्ता पाउने उल्लेख छ ।

सामुदायिक विद्यालयको शैक्षिक गुणस्तर सुधारका लागि विभिन्न पहलहरू गरिरहेको नगरपालिकाले शैक्षिक सुधारमा लागेका शिक्षकहरूको मनोबल उच्च बनाउनका लागि उक्त कार्यक्रम लागू गरिएको जनाइएको छ । नगरपालिकामा १२ वटा माध्यमिक, १५ वटा आधारभूत र ५९ वटा प्राथमिक तह गरी ८६ वटा सामुदायिक विद्यालय सञ्चालनमा रहेका छन् । नगर कार्यपालिकाको निर्णयअनुसार शिक्षकलाई स्थानीय भत्ता उपलब्ध गराउनका लागि एक आर्थिक वर्षमा एक करोड ७३ लाख खर्च हुने अनुमान गरिएको छ ।

बाल विकास केन्द्रदेखि कक्षा–१२ सम्म करिब पाँच हजार दुई सय विद्यार्थी अध्ययनरत रहेको नगरपालिकामा ३ सय ९ जना शिक्षक कार्यरत छन् । सेवा सुविधाका हिसाबले नेपाल सरकारको ‘ग’ वर्गमा राखिएको खोटाङका शिक्षकले सोही अनुसार स्थानीय भत्ता पाउने कार्यविधिमा उल्लेख छ । नेपाल सरकारले तोकेअनुसार नगरपालिकाबाट स्थानीय भत्ता पाउने भएपछि हलेसी तुवाचुङ नगरपालिकाभित्र कार्यरत शिक्षकहरू उत्साहित भएका छन् ।

शिक्षकलाई स्थानीय भत्ता दिने व्यवस्था कार्यान्वयनका लागि नेपाल शिक्षक महासङ्घ हलेसी तुवाचुङ नगर समितिले गत कात्तिक–२६ गते नगरपालिकाको ध्यानाकर्षण गराएको थियो ।

शिक्षा, विज्ञान तथा प्रविधि मन्त्री महावीर पुनले नेपाल सरकारले लागू गरेको शिक्षकका लागि स्थानीय भत्ता कार्यक्रम तत्काल कार्यान्वयन गर्न निर्देशन दिनुभएको थियो । स्थानीय भत्ताका लागि सङ्घीय सरकारले बजेट समेत उपलब्ध गराउँदै आएको छ । मन्त्री पुनले यही यही मङ्सिर–९ गते सामाजिक सञ्जाल फेसबुकमा स्ट्याटस लेख्नुहुँदै तत्काल कार्यान्वयन गर्न स्थानीय तहहरूलाई निर्देशन दिनुभएको हो ।

जिल्लाका दश स्थानीय तहमध्ये बराह पोखरी गाउँपालिकाले शिक्षकलाई स्थानीय भत्ता दिने कार्यक्रम कार्यान्वयनमा लगिसकेको छ । जिल्लाका अन्य स्थानीय तहले अहिलेसम्म स्थानीय भत्ता कार्यक्रम कार्यान्वयन गरेका छैनन् ।।