आजै केन्द्रीय कार्य सम्पादन समितिको बैठक आव्हान

काठमाडौँ- नेपाली काँग्रेसले आजै केन्द्रीय कार्यसम्पादन समितिको बैठक डाकेको छ ।

आज अपराह्न ४ बजे केन्द्रीय कार्यालय सानेपामा बस्ने गरी कार्य सम्पादन समितिको बैठक आह्वान गरिएको मुख्यसचिव कृष्णप्रसाद पौडेलले जानकारी दिनुभयो।

काँग्रेसमा महामन्त्री गगन थापा र विश्वप्रकाश शर्माले विशेष महाधिवेशनको आव्हान गरेपछि आन्तरिक विवाद चर्किएको छ ।

पार्टीले नियमित महाधिवेशन आगामी बैशाख २८ गतेदेखे गर्ने गरी कार्यतालिका सार्वजनिक गरेको  छ। तर महामन्त्रीद्वय थापा र शर्माले संयुक्त वक्तव्य जारी गरेर विशेष महाधिवेशन आह्वान गरेपछि पहिलो पटक केन्द्रीय कार्यसम्पादन समिति बैठक बस्न लागेको हो ।

विशेष महाधिवेशनलाई महामन्त्री पक्षधर नेताहरुले वैधानिक वाध्यता भन्दै आएका छन भने संस्थापन पक्षले नियमित महाधिवेशनको कार्यक्रम सुरु भइसकेकोले विशेष महाधिवेशनको औचित्य नरहने भन्दै विरोध गरेका छन ।

काँग्रेसले १५औँ महाधिवेशन यही पुष २६ गतेबाट गर्ने गरी कार्यतालिका सार्वजनिक गरेपनि क्रियाशील सदस्यता नवीकरणको विषयलाई लिएर महाधिवेशन सारिएको थियो ।

तर पार्टीका ५४ प्रतिशत महाधिवेशन प्रतिनिधिहरुले विशेष महाधिवेशनको प्रस्ताव केन्द्रीय समितिलाई बुझाएपछि यो विषय झन पेचिलो बन्दै गएको हो ।

विशेष महाधिवेशन पक्षधरहरुले यही पुष २७ गतेदेखि काठमाडौँको भृकुटी मण्डपमा विशेष महाधिवेशन गर्ने तयारी गरेका छन ।।