अब घिसिङसँगको सहमति औपचारिक रुपमा अघि बढ्छ: सभापति लामिछाने

चितवन- राष्ट्रिय स्वतन्त्र पार्टी (रास्वपा)का सभापति रवि लामिछानेले हिजोमात्रै मन्त्री पदबाट राजीनामा दिनुभएका कुलमान घिसिङसँग भएको सहमतिलाई अब पार्टी प्रक्रियामार्फत औपचारिकता दिने तयारी भइरहेको बताउनुभएको छ ।

आज चितवन जिल्ला अदालतमा उपस्थित भएर फर्कने क्रममा पत्रकारहरूसँग संक्षिप्त कुराकानी गर्दै सभापति लामिछानेले सरकारमै रहेको समयमा सहमति गरेको अब राजीनामा दिएर आएपछि सो सहमतिलाई पार्टीले औपचारिकता दिने बताउनुभयो ।

केही साता अघि राष्ट्रिय स्वतन्त्र पार्टी र कुलमान घिसिङ संरक्षक रहेको उज्यालो नेपालबीच सहमति भएको थियो ।

सहमतिअनुसार कुलमान घिसिङलाई उपसभापतिसहित दोस्रो वरियतामा राख्ने निर्णय भएको थियो ।

राजनीतिमा सक्रिय भएपछि घिसिङलाई प्रधानमन्त्री सुशीला कार्कीले नै राजीनामा दिन आग्रह गर्नुभएको थियो ।

घिसिङले हिजो राति पत्रकार सम्मेलन गरेर मन्त्री पदबाट राजीनामा दिएको घोषणा गर्नुभएको हो ।।