प्रदेश सरकारले मृतकका परिवारलाई १-१ लाख रुपैयाँ राहत दिने
कैलाली- सुदूरपश्चिम सरकारले बैतडी बस दुर्घटनामा परेर ज्यान गुमाएकाहरुको परिवारलाई १-१ लाख रुपैयाँ राहतस्वरुप दिने निर्णय गरेको छ ।
आज बसेको मन्त्रिपरिषद् बैठकले बस दुर्घटनामा ज्यान गुमाएका मृतकका परिवारलाई मानवीय सहायता स्वरूप जनही एक लाख रुपैयाँ उपलब्ध गराउने निर्णय गरेको हो ।
यस्तै बैठकले बस दुर्घटनामा परी घाइते भएकाहरूको सरकारी अस्पतालमा लाग्ने औषधि उपचार खर्च प्रदेश सरकारले व्यहोर्ने निर्णय पनि गरेको छ ।
बैतडीको पुर्चौडीबाट जन्ती बोकेर बझाङतर्फ गइरहेको बस बिहीबार राति पुर्चौंडी नगरपालिका–७ बडगाउँमा दुर्घटना हुँदा १३ जनाको मृत्यु भएको थियो ।
दुर्घटनामा ३४ जना घाइते भएका छन् ।
२५ जनाको डडेल्धुरा अस्पताल, ५ जनाको धनगढीको निसर्ग अस्पताल र चार जनाको देउलेक स्वास्थ्य चौकीमा उपचार भइरहेको छ ।
प्रदेश सरकारले दुर्घटनामा परी घाइते भएकाहरुको थप उपचारका लागि काठमाडौँसम्म पुर्याउन आवश्यक भए हेलिकप्टर व्यवस्था पनि गरेको छ ।।
प्रतिक्रिया राख्नुहोस्