कसैलाई गाली नगरी एकढिक्का भएर निर्वाचनमा लाग्नुस्: काँग्रेस उपभापति शर्मा

चितवन- नेपाली कांग्रेसका उपसभापति विश्वप्रकाश शर्माले कसैलाई गाली नगरी एकढिक्का भएर निर्वाचनमा लाग्न नेता कार्यकर्तालाई आग्रह गर्नुभएको छ ।

कांग्रेस चितवनले आज आयोजना गरेको कार्यक्रममा उहाँले आफ्नो कुरा प्रष्ट रूपमा राख्न अरुलाई कुनै पनि हिसाबले लाञ्छित नगर्न आग्रह गर्नुभएको हो ।

उपसभापति शर्माले कसैलाई गाली नगरी आफ्ना कुरा जनतालाई बुझाउन र निर्वाचनमा एकढिक्का भएर पार्टीलाई जिताउन नेता तथा कार्यकर्ताहरुलाई आग्रह पनि गर्नुभयो । 

उहाँले पार्टीभित्र भएको विशेष महाधिवेशनले मैलो पखालेको भन्दै देश बदल्ने सङ्कल्पसहित गुटरहित मानसिकता चुनावमा होमिएको सन्देश दिन पनि निर्देशन दिनुभयो ।

पार्टीले फागुन २१ लक्षित गर्दै २१ दिने अभियान सञ्चालन गर्न लागेको भन्दै उपसभापति शर्माले अभियानका क्रममा जिल्ला, प्रदेश र केन्द्रले खटाएका नेताबाहेक अन्य नेताहरू आफ्नै वडामा २१ दिन खटिन स्पष्ट निर्देशन दिनुभयो ।।