पहिरोले भेडेटार–रवि–राँके सडक अवरुद्ध

धनकुटा– लगातार दुई दिनदेखि पहिरो जाँदा धनकुटा र पाँचथर जोड्ने भेडेटार–रवि–राँके सडक अझै सञ्चालनमा आउन सकेको छैन । सडक अन्तर्गत साँगुरीगढी गाउँपालिका–३ नाम्जे नजिक शुक्रबार बिहानदेखि पहिरो खसिरहेको हो ।

सडकमा थुप्रिएको माटो र ढुंगा पन्छाउने प्रयास भए पनि हिजो बिहानदेखि पुनः पहिरो खस्न थालेपछि समस्या झन् बढेको छ । प्रहरीका अनुसार करिब ३ सय मिटर क्षेत्रमा माटोढुंगा थुप्रिएपछि सडक पूर्ण रूपमा अवरुद्ध भएको छ ।

सो स्थानमा खटिएका इलाका प्रहरी कार्यालयका प्रहरी नायब निरीक्षक रमेश प्रधानका अनुसार सडक माथिल्लो भागबाट ढुंगा, माटो तथा रुख समेत झरेका कारण यातायात सेवा अवरुद्ध छ । सडक निर्माणको जिम्मा लिएको एप्को इन्फ्राटेच निर्माण कम्पनीले एक्स्काभेटर तथा जेसीभी लगायतका उपकरण प्रयोग गरेर पहिरो हटाउने प्रयास गरिरहेको भए पनि लगातार पहिरो झर्दा काममा कठिनाइ भएको प्रहरीले जनाएको छ।

सडक अवरुद्ध भएपछि रोकिएका सवारी साधनलाई वैकल्पिक मार्गबाट गन्तव्यतर्फ पठाउने व्यवस्था मिलाइएको छ । हाल सो सडक थप चौडा विस्तार गरि स्तरोन्नतिको गर्ने काम भइरहेको थियो ।