कैलाली-४ बाट रास्वपाका खेमराज कोईराला विजयी

काठमाडौँ- प्रतिनिधि सभा निर्वाचन अन्तर्गत कैलाली-४ बाट रास्वपाका खेमराज कोईराला निर्वाचित हुनुभएको छ । उहाँ २८५५६ मतसहित विजयी हुनुभएको छ । उहाँका निकटतम् प्रतिद्वन्द्वी नेपाली काँग्रेसका गोरख बहादुर विष्टले ११३०१ मत प्राप्त गर्नुभएको छ ।

कैलाली-४ का ४८ वर्षीय खेमराज कोइरालाले ग्रामीण विकास विषयमा स्नातकोत्तर गर्नुभएको छ। शिक्षा र सामाजिक क्षेत्रमा सक्रिय उहाँ विभिन्न संस्थामार्फत समुदायसँग जोडिएर काम गर्दै आउनु भएको छ।

कोईराला निजी तथा आवासीय विद्यालय संगठन-नेपाल (NPABSON) र लायन्स क्लबमा आबद्ध हुनुहुन्छ। साथै ट्रान्सफर्मेटिभ सोसाइटी अफ नेपालका आजीवन सदस्यसमेत रहनु भएको छ। यी संस्थामार्फत उहाँले नेतृत्व, व्यवस्थापन तथा सामाजिक सेवामा अनुभव हासिल गर्नुभएको छ।

शिक्षा, सेवा र सामाजिक रूपान्तरणको क्षेत्रमा सक्रिय रहँदै आएका कोइरालाले स्थानीय विकासका विषयमा पनि काम गर्दै आउनु भएको छ। प्राकृतिक स्रोत, कृषि र पर्यटनको सम्भावनालाई उपयोग गरी स्थानीय स्तरमा विकासलाई अघि बढाउनुपर्ने उहाँको धारणा रहेको छ।

गौरीगंगा-चौमाला क्षेत्रको मौलिकता र सम्भावनालाई आधार मानेर भुइँ तहमा बसेर काम गर्दै वास्तविक परिवर्तन ल्याउने उद्देश्यसहित उहाँ सामाजिक तथा सार्वजनिक जीवनमा पनि उतिकै सक्रिय रहँदै आउनु भएको छ।।