दाउन्नेमा एकतर्फी सवारी सञ्चालन, यात्रुलाई सास्ती

पूर्वपश्चिम राजमार्ग अन्तर्गत दाउन्ने सडक खण्डमा एकतर्फी सवारी संचालन भएको छ । वर्षा भए सँगै शुक्रवार देखि अवरुद्ध बनेको नवलपरासी पूर्वको विनयी त्रिवेणी गाउँपालिका २ स्थित दाउन्ने खण्डमा आज बिहान देखि एकतर्फी पालौपालो सवारी संचालन हुन थालेको हो ।

निर्माणको क्रममा रहेको यस दाउन्ने खण्डमा वर्षा भएसंगै सडक चिप्लो र हिलो भएर यातायात अवरुद्ध हुदै आएको छ । अहिले सामान्य रुपमा एकतर्फी संचालनमा आएपनि हिलो सडकमा सवारी साधनलाई दाउन्नेको उकालोमा उक्लन समस्या भएको प्रहरीले जनाएको छ ।

जिल्ला प्रहरी कार्यालयका प्रहरी उपरीक्षक युवराज खड्काका अनुसार आज विहानदेखि एकतर्फी सामान्य रुपमा सवारी पास हुन लागेको छ । अहिले दुम्किवासको ज्यामिरे सम्म करिब पाच किलोमिटर सवारीको जाम रहेको छ ।

तीन दिनदेखि सडक अवरुद्ध हुदा यात्रु र चालकहरु अलपत्र परेका छन । नारायणगढ बुटवल सडक खण्डको अधिकाशं भाग कालोपत्रे भए पनि दाउन्नेको करिब चार किलोमिटर सडक निर्माणको काम समयमै नसकिदा यात्रुले निकै सास्ती झेल्दै आएका छन ।