मल आपूर्तिका लागि मन्त्री चौधरीको पहल

काठमाडौँ– कृषि तथा पशुपन्छी विकास र वन तथा वातावरण मन्त्री गिता चौधरीले रासायनिक मल आपूर्तिको विषयलाई उच्च प्राथमिकतामा राख्दै परराष्ट्र मन्त्रालयसँग आपूर्तिको पहल गर्नुभएको छ ।

मन्त्री चौधरीले परराष्ट्र मन्त्री शिशिर खनालसँग भेटवार्ता गर्दै मल आपूर्तिमा देखिएको समस्या समाधानका लागि कूटनीतिक पहल गर्नुभएको हो । पश्चिम एशियामा देखिएको संकटका कारण आपूर्ति व्यवस्थापन सहज गर्नका लागि उहाँले पहल गर्नुभएको हो ।

मौज्दात भएको रासायनिक मलको व्यवस्थापनका लागि मन्त्रालयले सरोकारवाला निकायलाई जानकारी गराई सकेको छ । हालसम्म सरकारसँग करिब असारसम्म पुग्ने मल मौज्दात छ ।

सो पश्चातका लागि मन्त्री चौधरीले थप १ लाख ५० हजार मेट्रिक टन मल जी–टु–जी माध्यमबाट खरिद गर्ने निर्णय गरिसक्नुभएको छ । मन्त्रिस्तरीय निर्णय (२०७९ चैत १९) अनुसार परराष्ट्र मन्त्रालयमार्फत भारतीय पक्षसँग आवश्यक समन्वय अघि बढाइएको छ ।

नेपालस्थित भारतीय दूतावाससँग पनि सम्पर्क गरी प्रक्रिया अगाडि बढाइएको छ । यसबीच, वैकल्पिक व्यवस्थापनका लागि अन्य क्षेत्रबाट पनि पहल भइरहेको छ ।