प्रधानन्यायाधीश नियुक्तिका लागि संवैधानिक परिषदको बैठक आज
काठमाडौँ- प्रधानन्यायाधीश नियुक्तिको प्रस्ताव गर्ने मुख्य कार्यसूचीसहित संवैधानिक परिषदको बैठक आज बस्दैछ । संवैधानिक परिषद्का अध्यक्ष एवम् प्रधानमन्त्री बालेन्द्र शाहको अध्यक्षतामा बैठक आज अपरान्ह ५ बजे बस्ने परिषद् सचिवालयले जनाएको छ ।
मन्त्रिपरिषदको सिफारिसमा राष्ट्रपतिले संवैधानिक परिषद् सम्वन्धी अध्यादेश जारी गर्नुभए पछि आज पहिलो बैठक बस्न लागेको हो ।
बैठकले प्रधानन्यायाधीश नियुक्ति प्रक्रिया अघि बढाउने सचिवालयले जनाएको छ ।
प्रधानमन्त्री अध्यक्ष हुने व्यवस्था रहेको परिषदमा प्रधानन्यायाधीश, सभामुख, राष्ट्रिय सभाका अध्यक्ष, प्रतिनिधि सभामा प्रमुख प्रतिपक्षी दलका नेता र उपसभामुख सदस्य रहने संवैधानिक व्यवस्था छ ।
प्रधानन्यायाधीश नियुक्तिका लागि सिफारिस गर्ने बैठकमा भने प्रधानन्यायाधीशको सट्टा कानुनमन्त्रीले सदस्यको रुपमा काम गर्ने व्यवस्था छ ।
संवैधानिक परिषदको सिफारिसमा राष्ट्रपतिले प्रधानन्यायाधीश नियुक्त गर्ने संवैधानिक व्यवस्था छ । न्याय परिषद्ले भावी प्रधानन्यायाधीश नियुक्तिका लागि कायममुकायम प्रधानन्यायधीश रहनुभएकी वरिष्ठतम न्यायाधीश सपना मल्ल प्रधान, न्यायाधीशहरू डा. मनोजकुमार शर्मा, कुमार रेग्मी, हरि फुयाँल, तिलप्रसाद श्रेष्ठ र डा.नहकुल सुवेदी सहित ६ जना न्यायाधीशको नाम संवैधानिक परिषद्मा सिफारिस गरिसकेको छ ।
सर्वोच्च अदालतमा न्यायाधीशका रूपमा ३ वर्ष काम गरिसकेका व्यक्ति प्रधानन्यायाधीशका लागि योग्य हुने कानुनी व्यवस्था छ ।।
प्रतिक्रिया राख्नुहोस्