विपक्षी दलहरुको अडान कायमै, बैठक फेरि स्थगित

काठमाडौँ- प्रतिनिधि सभा बैठक फेरि दोश्रो पटक स्थगित भएको छ ।
विपक्षी दलहरुले सरकारको तर्फबाट प्रधानमन्त्रीले नै जवाफ दिनुपर्ने अडान राखेपछि बैठक स्थगित भएको हो ।

सरकारको नीति तथा कार्यक्रम अर्थमन्त्रीले टेबल गरेपनि जवाफ दिन वा संसदमा प्रधानमन्त्रीको उपस्थिति अनिवार्य भएको विपक्षीहरुको अडान छ ।

प्रतिनिधि सभाको आजको दोश्रो बैठकमा प्रमुख प्रतिपक्षी दल नेपाली काँग्रेसले प्रधानमन्त्रीलाई बैठकमा उपस्थित हुन सभामुखले रुलिङ गर्नुपर्ने माग गरेको थियो ।

बैठक फेरि १५ मिनेटका लागि स्थगित भएको हो ।

यसअघि पहिलो बैठक पनि १५ मिनेटका लागि स्थगित भएको थियो तर करिब १ घण्टापछि मात्र सुरु भयो ।

प्रधानमन्त्री बालेन्द्र शाहले आज सांसदहरुको जवाफ दिने भने पनि अन्तिम क्षणमा आएर आउन नसक्ने पत्र पठाउनुभएको थियो ।।