घुसबापतको रकमसहित यादव पक्राउ

महोत्तरी- अख्तियार दुरुपयोग अनुसन्धान आयोगको बर्दिबासको टोलीले महोत्तरीकै सोनमा गाउँपालिकाका प्रमुख प्रशासकीय अधिकृत श्रीदेव यादवलाई ७२ हजार रुपैयाँ घुससहित रंगेहात पक्राउ गरेको छ।

बर्दिबासबाट खटिएको अख्तियारको टोलीले यादवलाई सडक ढलान योजनाको रकम निकासा गरिदिने नाममा अवैध रकम लिइरहेको अवस्थामा शुक्रबार पक्राउ गरेको हो । 

आयोगका अनुसार यादवले सार्वजनिक पदको दुरुपयोग गर्दै व्यक्तिगत लाभका लागि उपभोक्ता समितिसँग गैरकानुनी रूपमा रकम माग गरेका थिए।

उनले सोनमा गाउँपालिका–२ स्थित मस्जिददेखि साजिदको घरसम्म निर्माण गरिएको सडक ढलान योजनाको विनियोजित बजेटबाट रकम माग गरेको आरोप छ।

घुस लेनदेन भइरहेको सूचनाका आधारमा खटिएको अख्तियारको टोलीले उनलाई रकमसहित नियन्त्रणमा लिएको हो। पक्राउपछि यादवमाथि थप अनुसन्धान तथा आवश्यक कानुनी प्रक्रिया अघि बढाइएको आयोगले जनाएको छ।।