अन्तिम चुनावी अभियानमा ह्यारिस र ट्रम्प

अमेरिकाको राष्ट्रपतीय निर्वाचनको दौडमा रहनु भएका कमला ह्यारिस र डोनाल्ड ट्रम्प आज अन्तिम चुनावी अभियानमा सहभागी हुँदै हुनुहुन्छ ।

केही दिनदेखि मतदाता र तिनको भोट अनिश्चित रहेका राज्यहरुमा चुनावी अभियानलाई निरन्तरता दिइरहेका दुबै उम्मेदवारहरु अन्तिम दिनको चुनावी दौडमा पनि ती राज्यहरुमा केन्द्रित भइरहनु भएको छ ।

अमेरिकी नागरिकले आफ्नो आगामी राष्ट्रपतिको चयन गर्नुअघि आज राति ह्यारिस र ट्रम्पले आफ्ना मतदाताहरुलाई अन्तिम सन्देशमार्फत सम्बोधन गर्नुहुनेछ ।

वर्तमान उपराष्ट्रपतिसमेत रहनु भएकी डेमोक्रयाट उम्मेदवार कमला ह्यारिसले आज पेन्सिलभेनियामा अन्तिम चुनावी सभालाई सम्बोधन गर्दैहुनुहुन्छ ।

भुतपूर्व राष्ट्रपति समेत रहनुभएका अर्का उम्मेदवार रिपब्लिकन नेता डोनाल्ड ट्रम्प पेन्सिलभेनियासहित क्यारोलिना र मिचिगन राज्यहरुमा जानुहुने भएको छ ।

यसैबीच, साढे सात करोड अमेरिकीले अग्रिम रुपमा मतदान गरिसकेको तथ्याङ्क सार्वजनिक भएको छ ।

अमेरिकामा नोभेम्बर पाँच तारिख  अर्थात भोलि मुख्य निर्वाचन हुँदैछ ।

अमेरिकामा मतदाताको प्रत्यक्ष मतबाट नभई मतका आधारमा ‘इलेक्टोरल कलेज’ भनिने निर्वाचक मण्डलले राष्ट्रपति छान्ने व्यवस्था छ ।

त्यहाँका ५० राज्य राज्यहरूलाई दिइएको कुल ५ सय ३८ मतभार मध्ये कम्तिमा २७० इलेक्टोरल कलेज मत पाउने उम्मेदवार राष्ट्रपति निर्वाचित हुन्छन्।

विजयी उम्मेदवारले जनवरी २०२५ बाट नयाँ राष्ट्रपतिको रुपमा कार्यकाल शुरु गर्नेछन् । अमेरिकी राष्ट्रपतिको कार्यकाल चार वर्षको हुने व्यवस्था छ।।