भक्तपुरको बाल कोटमा बाबुछोरा मृत भेटिए

भक्तपुर –  बाल कोटमा बुबा र छोरा मृत अवस्थामा फेला परेका छन् ।

सूर्य विनायक नगरपालिका वडा नं २ बाल कोट फिकाधारास्थित साढे तीन तल्लाको घरमा डेरामा बस्दै आएका उनीहरू सोमबार मृत अवस्थामा फेला परेका हुन ।

खोटाङ रुपाकोट मजुवा गढी नगरपालिका १ घर भई हाल बाल कोटमा डेरा गरी बस्ने वर्ष ५६ का कुलप्रसाद आचार्य र निजका छोरा वर्ष २२ का प्रवीण आचार्य रहेको जिल्ला प्रहरी परिसर भक्तपुरले जनाएको छ ।

चार वर्षदेखि डेरामा बस्दै आएका उनीहरू छुटाछुटै दुई वटा कोठामा बाहिरबाट ताला लगाई भित्र अचेत अवस्थामा रहेको सूचना प्राप्त हुनासाथ जिल्ला प्रहरी परिसर भक्तपुर र मध्यपुर थिमि वृत्तको प्रहरी टोली बिहान नौ बजे घटनास्थलमा पुगेर अनुसन्धान थालेको थियो ।

साढे तीन तल्ले पक्की घरको तल्लो तल्लामा उनीहरू दुवै जना मृत अवस्थामा फेला परेको परिसरका सूचना अधिकारी प्रहरी नायव उपरीक्षक ढुण्डिराज न्यौपानेले बताउनु भयो ।