पोखरीमा कार डुब्दा अमेरिकाको भर्जिनियामा दुई नेपालीको मृत्यु

काठमाडौं- अमेरिकाको भर्जिनियामा कार दूर्घटना हुँदा दुई जना नेपालीको मृत्यु भएको छ । स्थानीय समयअनुसार हिजो बिहिबार भर्जनियाको च्यान्टिलीस्थित विन्डम होटल परिसरमा रहेको पोखरीमा कार चिप्लिएर खस्दा सो दूर्घटना भएको हो ।

काउन्टी प्रहरीले दिएको जानकारी अनुसार होटेल नजिकै ती दुई नेपाली चढेको कार हिउँका कारण चिप्लिँदै पोखरीमा खसेपछि दुवै जनाको निधन भएको हो । मृतकहरूमा बुटवल स्थायी घर भई भर्जिनियाको च्यान्टिली बस्ने ५५ वर्षीय कर्णबहादुर खड्का र काठमाडौँका २१ वर्षीय निश्चल भट्ट रहेको पारिवारिक स्रोतले जनाएको छ ।

भट्ट विद्यार्थी भिसामा छ महिना अघि मात्र अमेरिका गएका थिए । पारिवारिक स्रोतका अनुसार, खड्का र भट्ट मामा भान्जा हुन् ।

उनीहरूले चलाएको गाडी पोखरीभित्र खसेपछि उनीहरू निस्कन नसकेका कारण निधन भएको प्रहरीको भनाइ छ । खड्का सोही होटलमा हाउस किपिङमा काम गर्दै आएका थिए । प्रहरीले यस बारे थप अनुसन्धान गरिरहेको छ ।