तुम्लिङटारबाट काठमाडौँ उड्न लागेको बुद्ध एयरको जहाजमा समस्या

सखुवासभा- संखुवासभाको तुम्लिङटार विमानस्थलबाट काठमाडौँ उड्न लागेको बुद्ध एयरको जहाजमा प्राविधिक समस्या देखिएपछि उडान रद्द भएको छ ।

बुद्ध एयरको उडान नं. २८२ को कल साइन ‘९एन–एवसी’ जहाजको इन्जिनमा समस्या देखिपछि उठान रद्द भएको हो ।

दिउँसो १२:१७ बजे तुम्लिङटार अवतरण भएपछि बुद्ध एयरको दाहिने साइडको पङ्खामा प्राविधिक समस्या देखिएपछि उडान रद्द भएको तुम्लिङटार विमानस्थलका प्रमुख नवराज दाहालले बताउनुभयो ।

उहाँका अनुसार काठमाडौँबाट तुम्लिङटार अवतरण भए लगत्तै बुद्ध एयरको दाँहिने साइडको पङंखामा रहेको जेनेरेटरमा प्राविधिक समस्या देखिएको थियो।

बुद्ध एयरको जहाजमा प्राविधिक समस्या देखिएपछि तुम्लिङटार विमानस्थलदेखि काठमाडौँ उड्न लागेका यात्रु ३ घण्टा बढी तुम्लिङटार विमानस्थलमै रोकिएका थिए ।

इन्जिनमा प्राविधिक समस्या देखिएकाले अर्को जहाज मार्फत काठमाडौँ ल्याइएको छ । उक्त जहाजमा ३ बालबालिकासहित ६४ जना र चालक दलका चार सदस्य थिए ।

उक्त जहाज मर्मतका लागि अर्को जहाज मार्फत प्राविधिक झिकाइएको छ । तुम्लिङटार विमानस्थलमा निजी कम्पनीका विमानले उडान भर्दै आएका छन् ।

यहाँबाट संखुवासभा,भोजपुर,धनकुटाका बासिन्दा लाभान्वित भएका छन् ।

तुम्लिङटार विमानस्थल पहाडी जिल्लाको सबैभन्दा बढी यात्रु भिढभाड हुने गर्दछ । तुम्लिङटार विमानस्थलमा बुद्धको एटीआर–७२ ले दैनिक उडान भर्दै आएको थियो ।

धावनमार्गको स्तरोन्नति भएसँगै १ बर्षदेखि बुद्ध एयरको एटीआर ७२ सिटको जहाजले दैनिक उडान भर्ने थालेको थियो ।

विश्वकै पाँचौ अग्गो हिमाल मकालु,अरुण तेस्रो जलविद्युत आयोजना,पर्यटकका लागि छोटो दूरीको उडानका कारण यहाँको विमास्थल व्यस्त देखिन्छ ।।