पर्यटकीय मार्ग निर्माणले गति लिन सकेन (फोटो फिचर)

मकवानपुर- इन्द्रसरोवर गाउँपालिकाको कलंकीदेखि मार्खु–विशंखेलसम्मको पर्यटकीय मार्ग निर्माणको काम निर्धारित समयमा सम्पन्न नहुँदा स्थानीयले सास्ती खेप्न बाध्य भएका छन् ।

बागमती प्रदेश सरकारको लगानीमा निर्माणाधीन ८ दशमलव ८ किलोमिटर सडकको भौतिक प्रगति ४५ प्रतिशत मात्रै रहेको छ । जसका कारण स्थानीयवासी वर्षायाममा हिलो र हिउँदमा धुलोको समस्या झेल्न बाध्य छन् ।

बागमती प्रदेशको भौतिक पूर्वाधार विकास मन्त्रालयको ३५ करोड २८ लाख ६२ हजार रुपैयाँ लगानीमा लामा आइएस आरआर जेभी काठमाडौँले दुई वर्षभित्र सडक निर्माण सम्पन्न गर्ने गरी २०८० असारमा ठेक्का सम्झौता गरेको थियो ।

तर, निर्माण कम्पनीको ढिलासुस्तीका कारण सडक निर्माणले गती पाउन सकेको छैन । असार मसान्तभित्र काम सक्नुपर्ने सम्झौता भए पनि हालसम्म ४५ प्रतिशत मात्रै काम सकिएको छ भने वित्तीय प्रगति ३० प्रतिशत छ ।

सम्झौता अनुसार सडक चौडा गरी कालोपत्रे गर्ने मुख्य जिम्मेवारी पाएको निर्माण कम्पनीले तोकिएको समयमा काम नसक्दा स्थानीयवासी, पर्यटक र इन्द्रसरोवर क्षेत्रका होटल व्यवसायी मारमा परेका छन् ।

सडक निर्माणमा भइरहेको ढिलाइले यस क्षेत्रमा आउने पर्यटकको संख्या घटेको र होटल व्यवसाय प्रभावित बनेको व्यवसायीहरूको गुनासो छ। पूर्वाधार विकास कार्यालय हेटौंडाका प्रमुख सुजन भण्डारीका अनुसार निर्माण कम्पनीलाई एक वर्ष समय थप गरिएको छ ।