सल्यानमा जीप दुर्घटना, १९ जना घाइते

सल्यान-सल्यानको शारदा नगरपालिका-१२ तिमिलेबाट श्रीनगरतर्फ जाँदै गरेको जीप दुर्घटना हुँदा १९ जना घाइते भएका छन्।

आज दिउँसो लु १ ज २३६८ नम्बरको जीप रेसमज्युलानजिकै ग्रामीण सडकमा दुर्घटना भएको जिल्ला प्रहरी कार्यालय सल्यानले जनाएको छ ।

जीप अनियन्त्रित भएर सडकदेखि करिब ५ मिटर तल खसेको प्रहरीले जानकारी दिएको छ।

जीपमा २० जना सवारमध्ये १९ जना घाइते भएका छन् ।

घाइते सबैको शारदा नगरपालिका–१ श्रीनगरस्थित कर्णाली अस्पतालमा उपचार भइरहेको जिल्ला प्रहरी कार्यालय सल्यानका सूचना अधिकारी प्रहरी निरीक्षक बाबुराम बस्नेतले जानकारी दिनुभएको छ ।

उहाँका अनुसार जीप चालक शारदा नगरपालिका–६ बस्ने २३ वर्षीय सुरेश बुढाथोकीलाई नियन्त्रणमा लिएर घटनाबारे थप अनुसन्धान भइरहेको छ ।।