गोरखामा आजबाट कृषि पर्यटन मेला

गोरखा-  गोरखा सदरमुकाममा आजबाट तेस्रो कृषि, पर्यटन तथा व्यापार प्रवर्धन मेला २०८२ सुरु हुने भएको छ । मेलाको आयोजना गोरखा चेम्बर अफ कमर्स र नेपाल ओमन चेम्बर अफ कमर्स गोरखाले आयोजना गरेको हो ।

मेलाको सबै तयारी पुरा भएको गोरखा चेम्बर अफ कमर्स अध्यक्ष राम स्वरूप श्रेष्ठले बताउनु भयो । उहाँका अनुसार मेला आउँदो ३० गतेसम्म सञ्चालनमा आउने छ ।

गोरखा नगरपालिका–६ को खेलकुद मैदानमा हुने मेलाको उद्घाटन गोरखा नगरपालिकाका मेयर कृष्ण बहादुर राना मगरले गर्ने गोरखा चेम्बर अफ कमर्सले जनाएको छ ।

कार्यक्रम अनुसार पहिलो दिन भोली बिहान ११ विभिन्न जातजातिहरूका कला, संस्कृति झल्कने सांस्कृतिक झाँकीहरू, महिला समूह, सङ्घ संस्थाहरू सम्मिलित झाँकीले गोरखा बजारको परिक्रममा गर्ने छ ।

मेला अवधिभर ३० देखी ३२ हजार मानिसले अवलोकन गर्ने अनुमान गरिएको छ । मेलामा करिब ४ करोडको कारोबार हुने अनुमान समेत गोरखा चेम्बर अफ कमर्सले गरेको छ ।

१५० वटा स्टल भएको मेलामा कृषि प्रदर्शनीका लागि १० वटा, होटल तथा रेस्टुरेन्टका लागि ६ वटा र बाँकी अन्य प्रयोजन कालागि प्रयोग हुने भएको छ ।

मेलामा बाल उद्यान, खेल तथा मनोरञ्जन, पिङका साथै कृषि उपज, घरेलु उत्पादन, हस्तकला, प्रविधि, पर्यटन तथा सेवा क्षेत्रका बस्तुहरू राखिने पनि अध्यक्ष श्रेष्ठले जानकारी दिनु भयो।