एक जनाको मृत्यु, १४ जना सवार रहेको प्रारम्भिक अनुमान

सुर्खेत- कर्णाली नदीमा खसेको गाडीमा एक जनाको मृत्यु भएको छ ।

कर्णाली राजमार्ग अन्तर्गत दैलेखको चामुण्डाविन्द्रासैनी नगरपालिकास्थित साङ्गेतडामा भएको दुर्घटनाको उद्धारका क्रममा नदीबाट एउटा शव निकालिएको प्रहरीले जनाएको हो । मृतकको पहिचान भने खुल्न सकेको छैन ।

सुर्खेतबाट कालीकोटको रास्कोट नगरपालिकाका लागि छुटेको यात्रुबाहक गाडी सडकबाट करिब पाँच सय मिटर तल नदीमा खसेको हो ।

दुर्घटनास्थलमा फेला परेको चलानी अनुसार रास्कोट नगरपालिका-२ की सिर्जना खड्काको नाम फेला परेको छ ।

त्यस्तै, सोही नगरपालिकाको वडा नम्बर ८ का अर्का एक व्यक्तिको नाम उल्लेख नभए पनि मोबाइल नम्बर मात्र लेखिएको पाइएको छ, तर उक्त नम्बरमा अहिले फोन लागिरहेको छैन ।

प्रहरीका अनुसार दुर्घटनास्थलमा सुरक्षाकर्मी र उद्धार टोली पुगेर खोजी कार्य तीव्र बनाए पनि गाडी नदीको गहिराइमा डुबेका कारण अहिलेसम्म फेला पर्न सकेको छैन ।

घटनास्थलबाट एक जना घाइतेलाई उद्धार गरिएको भए पनि घाइते बोल्न सक्ने अवस्थामा नभएको प्रहरीले जनाएको छ ।

दुर्घटनामा परेको यात्रुवाहक गाडीमा १४ जना सवार रहेको प्रारम्भिक अनुमान गरिएको छ ।

सो गाडी अनियन्त्रित भई नदीमा खसेको अनुमान गरिएको छ । दुर्घटनास्थलमा ३५ जनाको प्रहरी टोली उद्धारका लागि खटिएको छ । दुर्घटनाको विस्तृत विवरण आउन बाँकी छ ।।