मनास्लु आरोहका क्रममा हिउँले पुरिएर मृत्यु भएका दुईजनाको शव काठमाडौ पठाइयो

गोरखा-  चुमनुब्री गाउँपालिका-१ स्थित मनास्लु हिमालको क्याम्प–३ मा हिउँले पुरिएर मृत्यु भएका जर्मनी नागरिक ध्रुवज्योति गुहा र नेपाली नागरिक फुर्सेम्बा शेर्पाको शव काठमाडौं पठाइएको छ।

जिल्ला प्रहरी कार्यालय गोरखाका डीएसपी राजकुमार श्रेष्ठका अनुसार दुवै जनाको शव आज बिहान ६ः५२ बजे एभरेस्ट एयरको हेलिकोप्टरमार्फत काठमाडौंस्थित शिक्षण अस्पतालमा पठाइएको हो।

मनास्लु आरोहणका क्रममा चुमनुब्री गाउँपालिका–१ सामागाउँस्थित क्याम्प–३ मा यही असोज ४ गते टेन्टभित्र हिउँले पुरिएको अवस्थामा दुवै जनाको शव फेला परेको थियो। जर्मनी नागरिक गुहा मकालु एड्भेन्चर कम्पनी काठमाडौंमार्फत मनास्लु आरोहणका लागि नेपाल आएका आएका थिए ।

संखुवासभाको मकालु गाउँपालिका–२ का ४८ वर्षका नेपाली नागरिक शेर्पा ट्रेकिङ गाइड भएको प्रहरीको भनाइ छ । मौसम प्रतिकूल भएपछि तत्काल शव उद्धारमा समस्या भएको थियो। मौसम खुलेसँगै मंगलबार साँझ एभरेस्ट एयरको हेलिकोप्टरमार्फत दुवै शव उद्धार गरी सामागाउँ ल्याएर चुमनुब्री गाउँपालिका–१ स्थित वडा कार्यालयको कोठामा राखिएको थियो।

आज बिहान मौसम तथा उडानको अवस्था अनुकूल भएपछि दुवै शव हेलिकोप्टरमार्फत काठमाडौं पठाइएको हो ।