अजिरकोट र वारपाक जोड्ने पक्की पुलको मर्मत कार्य अन्तिम चरणमा

गोरखा- दरौंदीको बाढीले भत्काएको वारपाक जोड्ने पक्की पुलको मर्मत कार्य अन्तिम चरणमा पुगेको छ ।

असार अन्तिम साता दरौंदीको भेलले पुलको एक भागमा क्षति गरेको थियो । मर्मत सकेको एक सातामै गत साउन ४ गते बारपाक जोड्ने पक्की पुल भत्किएको हो ।

बाह्रकिलो–बारपाक सडक खण्ड अन्तर्गत बालुवाको पक्की पुलसँग जोडिएको सडक दरौँदीको भेलले भत्काएपछि जाली भरेर सडक बनाउने काम शुरु गरिएको सडक योजनाका प्रमुख राजेश यादवले बताउनुभयो ।

पुल भत्किएपछि आवातजावत ठप्प बनेको छ । उक्त सडक भएर बारपाक, लाप्राक, गुम्दाका स्थानीय आउजाउ गर्दै आएका छन् । सडक अवरुद्ध भएपछि अत्यावश्यक कामका लागि सदरमुकामसम्म आउजाऊ गर्न स्थानीय बासिन्दालाई सास्ती भएको छ ।

अजिरकोट गाउँपालिका र बारपाक सुलिकोट गाउँपालिका जोड्ने बालुवास्थित पक्की पुलको एकतिरको भाग पटक पटक नदिले कटान गर्ने गरेको छ ।

नदिको पुरै बहाव बालुवा वजारतिरको भागबाट बग्ने गरेको छ । पानीको बहावलाई वारपाक सुलिकोटतर्फ डाइभर्सन गराउन स्थानीय बासिन्दाले अवरोध गरेका कारण बाढीले पुलमा पटक पटक क्षति गरेको सडक योजनाका प्रमुख यादवले बताउनुभयो ।

गाडी आउन जान नमिले पनि पुलमा मान्छे भने हिँड्नसक्ने सडक योजनाका प्रमुख यादवले जानकारी दिनुभयो । पुल भत्किएपछि नदि वारी र पारी रोकिएका सवारी साधनले यात्रु पनि ओसारिरहेका स्थानीय बासिन्दाले बताएका छन् ।।