स्वर्गीय अधिकारीको स्मरणमा दुई आर्थिक पुरस्कार स्थापना

काठमाडौं- नेकपा (एमाले)का नेता तथा पहिलो कम्युनिष्ट अर्थमन्त्री स्वर्गीय भरतमोहन अधिकारीको स्मरणमा रु ५० हजार राशिको दुई वटा आर्थिक पुरस्कार स्थापना गरिएको छ ।

नेपाल आर्थिक पत्रकार सङ्घ (नाफिज) र भरतमोहन अधिकारी स्मृति फाउण्डेसनको सहकार्यमा आर्थिक समाचार लेखनमा सञ्चारकर्मीहरुको सम्मानका लागि पुरस्कारको स्थापना गरिएको हो । आर्थिक तथा सहकारीका क्षेत्रमा क्रियाशील आर्थिक पत्रकारको वृत्तिविकास, क्षमता विकास र असल पत्रकारिता अभ्यासमा प्रोत्साहन पु¥याउन ‘भरतमोहन अधिकारी–नाफिज आर्थिक पत्रकारिता पुरस्कार’ र ‘भरतमोहन अधिकारी–नाफिज सहकारी पत्रकारिता पुरस्कार’ स्थापना गरिएको हो ।

पुरस्कारले खोजमूलक आर्थिक पत्रकारितालाई प्रवद्र्धन गर्ने अपेक्षा गरिएको छ । अधिकारी अर्थमन्त्री हुँदा ‘आफ्नो गाउँ आफैँ बनाऔँ’ कार्यक्रम, गाउँगाउँमा सहकारीजस्ता कार्यक्रम ल्याइएको थियो ।

फाउण्डेसनकी संस्थापक महासचिव लिमा अधिकारीले मुलुकको आर्थिक, सामाजिक र राजनीतिक विकासका लागि अधिकारीले पु¥याएको योगदानको स्मरणमा पुरस्कार स्थापना गरिएको जानकारी दिँनुभयो । उहाँले पुरस्कारलाई साथ दिन पाउँदा सहकारी क्षेत्रमा उहाँले गर्न चाहेका तर अधुरै रहेका कामले सार्थकता पाउने विश्वास व्यक्त गर्नुभयो । महासचिव अधिकार स्वर्गीय अधिकारीकी पुत्री हुनुहुन्छ ।

नाफिजका अध्यक्ष मोदनाथ ढकालले नाफिज सक्रिय आर्थिक पत्रकारको छाता संस्था भएको बताउँदै खोजमुलक पत्रकारिता प्रवद्र्धन गर्न पुरस्कारले ठूलो भूमिका खेल्ने तथा समाचारको गुणस्तर र पत्रकारको प्रतिस्पर्धी क्षमता वृद्धि गर्न यस्ता पुरस्कारको महत्व रहेको बताउनुभयो ।

फाउण्डेसन र नाफिजबीच भविष्यमा यस्तै पुरस्कार प्रदान गर्न अक्षय कोष स्थापना गर्ने सहमति भएको जनाइएको छ ।

यो वर्षको ‘भरतमोहन अधिकारी–नाफिज आर्थिक पत्रकारिता पुरस्कार’ र ‘भरतमोहन अधिकारी–नाफिज सहकारी पत्रकारिता पुरस्कार’ यही मङ्सिर २८ गते नाफिजको छैठौँ महासभामा प्रदान गरिनेछ । पुरस्कार छनोटका लागि दुवै संस्थाको प्रतिनिधित्व रहनेगरी कार्यदल गठन गरिएको छ ।