सवारी कम चलेपनि राजमार्ग बिग्रने क्रम उस्तै

धादिङ- राजधानी काठमाण्डौ प्रवेश गर्ने लाइफ लाइनको रुपमा परिचित त्रिभुवन राजपथ र पृथ्वी राजमार्गको अवस्था जीर्ण र दयनीय बनेको छ ।

कोरोनाको संक्रमणका कारण सरकाले गरेको लक डाउनको अबधीमा एक पटक मर्मत सहित कालो पत्रे गरेको भएपनि सडक नराम्ररी बिग्रिएको छ ।

पृथ्वी राजमार्ग ठाँउ ठाँउमा भत्कन सुरु गरेको छ भने त्रिभुवन राजपथमा गरिएको कालो पत्रे सबै उप्कन थालेको छ ।
त्रिभुवन राजपथमा गरिएको कालो पत्रे त छ महिना पनि बित्न नपाउँदै उप्किउको छ ।

यो राजपथको देब्रे लेन नराम्ररी बिग्रिएको छ । लक डाउनका कारण सडकमा सवारी साविकको बेला जस्तो त्यति गुड्न भने पाएको छैन तर सडक चाँही दैनिक जसो जिर्ण बन्दै गएको छ ।

त्रिभुवन राजपथको नौ बिसे-नागढुङ्गा सडक खण्डको सबै जसो भागमा कालो पत्रे उप्किएर ठुला ठुला खाल्डा बनेको छ ।
सडक आसपासमा बसोवास गर्ने स्थानीय मानिसहरुले सडकमा उड्ने गरेको धुलोका कारण स्वास्थ्य समस्या समेत उत्पन्न हुन थालेको गुनासो गरेका छन् ।

सामान्य वर्षाको समयमा खाल्टा खुल्टीमा जम्मा हुने गरेको पानीका कारण कालो पत्रे सडक ग्रामीण सडक जस्तो बन्ने र घाम लाग्न साथ धुलाम्य हुने समस्याका कारण स्थानीयहरुले हैरानी बेहोर्नु परेको गुनासो गर्छन ।

यसो त राजमार्गमा सवारी हाँक्ने सवारी चालकहरु पनि सडकका कारण निकै समस्या आउन थालेको बताउँछन ।
सडक मर्मतसहित कालो पत्रे गर्दा ठेकेदार कम्पनीहरुले कमसल सामग्री प्रयोग गरेका कारण पनि सडकमा गरिएको कालो पत्रे लामो समयसम्म नटिकेको हो ।

सडक मर्मतका बेला अनुगमन गर्ने निकाय सडक विभागले गर्ने गरेको बेवास्था र निर्माणको जिम्मा लिएका ठेकेदार कम्पनीलाई विभागले कडाइका साथ निर्देशन दिन नसक्दा सडकको अबस्था दयनीय बनेको सरोकारवाला बताउँछन ।।