नेपाली कांग्रेसको पदाधिकारी बैठक आज पनि बस्दै

काठमाडौं- नेपाली कांग्रेसको पदाधिकारी बैठक आज पनि बस्दैछ । पार्टी नेता तथा पूर्व गृहमन्त्री बालकृष्ण खाँण पक्राउ परेपछि उत्पन्न परिस्थिति लगायत अन्य समसामयिक विषयमा छलफल गर्न आज पनि बैठक बस्न लागेको हो ।

हिजो बसेको बैठकमा नेता खाँणका बारेमा प्रारम्भिक छलफल भएपनि उनीमाथि प्रहरी अनुसन्धान जारी रहेको र सो अनुसन्धान परिपक्व नभएको भन्दै कुनै निर्णय गरिएको थिएन । यद्यपि बैठकमा नेता खाँणलाई निलम्बन गरेर अनुसन्धानमा सहयोग गर्नुपर्ने मत पनि आएको थियो ।

बैठकमा पार्टी विभाग र भ्रातृ संस्थालाई पूर्णता दिनेबारे पनि छलफल भएको प्रवक्ता प्रकाशशरण महतले जानकारी दिनुभएको छ । पार्टी पदाधिकारी र पूर्वपदाधिकारी समेतको बैठक दिउँसो २ बजे सभापति देउवा निवास धुम्बाराहीमै बस्‍ने बताइएको छ ।