शख्तर डोनेस्कलाई ५-० ले हराउँदै ईन्टर मिलान यूरोपा लिगको फाइनलमा प्रवेश

काठमाडौं- ईटालियन क्लब ईन्टरमिलान यूएफा यूरोपा लिगको फाइनलमा प्रवेश गरेको छ । गएराति भएको अन्तिम सेमिफाइनल खेलमा यूक्रेनी क्लब शख्तर डोनेस्कलाई ५-० को फराकिलो गोल अन्तरले पराजित गर्दै ईन्टरले फाइनलमा स्थान पक्का गरेको हो ।

ईन्टरको जितमा लाउटारो मार्टिनेज र रोमेलु लुकाकुले दुई-दुई गोल गरे । त्यस्तै ड्यानिलो डि एम्ब्रुसिओले एक गोल गरे । ईन्टरले अब फाइनलमा स्पेनिश क्लब सेभिलासँग प्रतिस्पर्धा गर्नेछ ।

आइतबार राति भएको पहिलो सेमिफाइलमा इङ्लिश क्लब म्यान्चेस्टर यूनाइटेडलाई एकका विरुद्ध दुई गोलले पराजित गर्दै सेभिलाले फाइनलमा प्रवेश गरेको हो ।

हालसम्म तीन पटक यूरोपा लिगको उपाधि जितेको ईन्टर पछिल्लो पटक सन् १९९८ मा लिग विजेता बनेको थियो भने सेभिलाले सबैभन्दा धेरै पाँच पटक उपाधि उचालेको छ ।

पछिल्लो पटक सन् २०१६ मा सेभिला लिग विजेता बनेको थियो । फाइनल खेल आउँदो शुक्रबार राति हुँदैछ ।-