कोरोनाले मृत्यु हुनेको संख्या ८ लाख नाघ्यो

काठमाडौं– विश्वभर महामारीको रुपमा फैलिएको कोभिड १९ को संक्रमणबाट मृत्यु हुनेको संख्या ८ लाख नाघेको छ ।

पछिल्लो २४ घन्टामा विश्वभर संक्रमणबाट ५ हजार ७ सय ८० को मृत्यु भएको तथ्याङक छ । विगत २४ घन्टामा सबैभन्दा धेरै अमेरिकामा ११ सय २३ जनाको संक्रमणका कारण मृत्यु भएको छ । थप ५० हजार संक्रमित थपिएसँगै अमेरिकामा संक्रमित हुनेको संख्या ५७ लाख नाघेको छ ।

यसैगरि ब्राजिलमा एकैदिन १ हजार ३१ जना कोरोना संक्रमितको मृत्यु भएसँगै संक्रमणका कारण ज्यान गुमाउनेको संख्या १ लाख १३ हजार नाघेको छ । यता दिनहुँ संक्रमण बढिरहेको भारतमा गत २४ घन्टामा मात्रै करिब ७० हजार भाइरसका नयाँ संक्रमित थपिएका छन् भने एकैदिन ९ सय ५३ जनाको मृत्यु भएको छ ।

विश्वभर कोरोनाबाट संक्रमित हुनेको संख्या २ करोड ३० लाख नाघेको छ । जसमध्ये सक्रिय संक्रमितको संख्या ६६ लाख ५ हजार ४ सय ९६ रहेको छ ।