सराङकोटमा महायज्ञबाट संकलित रकमबाट शिवमन्दिर निर्माण

कास्की- कास्कीको सराङकोटमा शिवमन्दिर निर्माण कार्य अन्तिम चरणमा पुगेको छ ।

सराङकोटलाई धार्मिक एवम् पर्यटकीय क्षेत्रका रुपमा देश विदेशमा चिनाउने मुख्य उद्देश्यका साथ मन्दिर निर्माण गरिएको हो । मन्दिर निर्माणको काम ८० प्रतिशत सम्पन्न भएको छ ।

भक्तपुरस्थित कृष्ण मन्दिरको शैलीमा सो मन्दिर निर्माण गरिएको छ । जसका लागि प्रयोग हुने सम्पूर्ण सामाग्री र जनशक्ति पनि भक्तपुरबाटै लगिएको छ । मन्दिर निर्माणमा हालसम्म र६ करोड रुपयाँ भन्दा बढी खर्च भइसकेको जनाइएको छ ।

विभिन्न समयमा महायज्ञ गरी उठेको रकमबाट निर्माण कार्य जारी राखिएको सराङकोट धार्मिक एवम् पर्यटन क्षेत्र विकास समितिका कोषाध्यक्ष शिवप्रसाद तिमिल्सिनाले जानकारी दिनुभयो ।

यतिवेला हवन कुण्ड तथा वाल निर्माण, तामाको पाताबाट छाना मोड्ने र एक सय आठ शिवलिङ्ग स्थापनाको तयारी पनि भइरहेको छ । मन्दिर यसै वर्षको शिवरात्रीसम्ममा सम्पन्न गर्ने योजना पनि बनाइएको छ ।

गाउँलेहरुले मन्दिर निर्माणका लागि वि.स. २०६१ मा महायज्ञ गरी तदर्थ समिति गठन गरेका थिए भने २०७५ मा पनि महायज्ञ लगाइएको थियो ।।