अजिरकोटको भिरकुनामा घरघरै धारा
गोरखा- गोरखाको अजिरकोट गाउँपालिका वडा नम्बर २ भिरकुनामा घरघरै धारा जडान भएपछि स्थानीय खुसी भएका छन् ।
गण्डकी प्रदेश सरकारको हरेक घरमा धारा पुर्याउने योजना अनुसार त्यहाँ २० घरधुरीलाई पानी बितरण गरिएको खानेपानी तथा सरसफाई डिभिजन कार्यालय गोरखाले जनाएको छ ।
एक सय ५० भन्दाबढि स्थानीयले पानी सहज रुपमा उपभोग गर्न पाएका खानेपानी उपभोक्ता समितिका अध्यक्ष रामबहादुर गुरुङले बताउनुभयो ।
प्रदेश सरकारको ४० लाख र करिब ६ लाख रुपैयाँको जनश्रमदानबाट निर्माण भएको उक्त आयोजनामा १२ घनमिटरको ट्याङ्की, आरसीसी इन्टेक एक, पानी संकलन टंकीट्याङ्की एउटा निर्माण गरिएको छ ।
फागुनबाट सुरु भएको उक्त आयोजना दुई महिना भित्रै निर्माण पुरा भएको डिभिजन कार्यालय गोरखाका प्रमुख तुल्सी बस्नेतले बताउनुभयो ।
दुई किलोमिटर टाढाबाट पानी घरमै झरेपछि यस अघि कुवाको पानी बोकेर पिउँदै आएका स्थानीयलाई सजिलो भएको छ ।
एक गाग्री पानीका लागि एक घण्टा समय खर्चनुपर्ने बाध्यता थियो । आगनमै धारामा पानी झरेपछि महिलाहरुलाई घरधन्दा गर्न, बस्तुभाउलाई पानी खुवाउन पनि सजिलो भएको स्थानीय महिलाहरु बताउँछन ।।
प्रतिक्रिया राख्नुहोस्