नोभाक जोकोभिच तेस्रो ग्रान्डस्लाम विम्बल्डनको फाइनलमा

विश्व नम्बर १ नोभाक जोकोभिच यस वर्षको तेस्रो ग्रान्डस्लाम विम्बल्डनको फाइनलमा प्रवेश गरेका छन् ।

२० पटकको ग्रान्डस्लाम विजेता तथा छैटौँ पटक विम्बल्डन हात पारिसकेका जोकोभिचले सेमिफाइनलमा ३-१ सेटको जीत निकाल्दै फाइनल यात्रा पक्का बनाएका हुन् । लन्डनको सेन्टर कोर्टमा गए राति सम्पन्न खेलमा क्यामरुन नोरीइलाई २-६,६-३,६-२ र ६-४ को सेटमा पराजित गर्दै जोकोभिच फाइनलमा पुगेका हुन् । पहिलो सेट गुमाएका जोकोभिचले त्यसपछिको तीनवटै सेटमा लगातार सजिलै जीत निकालेका थिए । अब भोली विम्बल्डनको फाइनल खेलमा जोकोभिचले अष्ट्रेलियन निक किरियससँग प्रतिस्पर्धा गर्नेछन् ।

निक किरियस भने नाडालबाट सेमिफाइनलमा वाकओभर पाउँदै फाइनलमा आइपुगेका हुन् । यता महिलातर्फको फाइनल खेल भने आज खेलिंदैछ । फाइनलमा विश्व बरियता ३ की ओन्स जाविओर र १७ औँ वरीयताकी इलेना रेबिकिना पहिलो पटक विम्बल्डन फाइनलमा भिड्दैछन् । खेल लन्डनको सेन्टर कोर्टमा नेपाली समयअनुसार साँझ ६.४५ बजेबाट सुरु हुँदैछ ।