चिकित्सकहरु आन्दोलनमा उत्रिएपछि सेवा प्रभावित

बैतडी- विगत नौ महिनादेखि अतिरित्त सेवा र विदाको दिन सेवा गरेवापतको रकम भुक्तानी नगरेको
भन्दै बैतडी अस्पतालका चिकित्सकहरु आन्दोलनमा उत्रिएका छन् । जसका कारण अस्पतालको
सेवा प्रभावित बनेको छ ।

आइतबारबाट बैतडी अस्पतालका चिकित्सक तथा कर्मचारीहरु आकस्मिक बाहेकका सेवा बन्द गर्दै
आन्दोलनमा उत्रिएका हुन् ।

सुदूरपश्चिम प्रदेश सामाजिक विकास मन्त्रालयलाई पटक–पटक पत्राचार गर्दासमेत चासो नदेखाएकाले दबाव स्वरुप आन्दोलनमा उत्रिनुपरेको जिल्ला अस्पताल बैतडीका चिकित्सक हरीषचन्द्र विष्टले बताउनुभयो ।

मन्त्रालयले आफुहरुको श्रम शोषण गरेको आरोप चिकित्सकहरुको छ । आफुहरु विरामीको सेवामा अहोरात्र खटिँदासमेत मन्त्रालयले आफुहरुको रकम भुक्तानी नगरेको स्वास्थ्यकर्मीहरुको गुनासो छ ।

कमिशन मिल्ने उपकरण खरिदमा मन्त्रालय अग्रसर देखिएपनि डाक्टरहरुले काम गरेको रकम भुक्तानीमा मन्त्रालय उदासिन देखिएको आरोप चिकित्सकहरुले लगाएका छन ।

डाक्टर बाहेक जिल्ला अस्पतालका अन्य कर्मचारीहरुले समेत अतिरिक्त सेवा वापतको रकम पाउन नसकेको जिल्ला अस्पताल बैतडीका डाक्टर धिरज जैसवाल बताउनुहुन्छ ।

अस्पतालको सेवा प्रभावित हुने भएपछि यहाँका विरामी तथा सेवाग्राहीहरुलाई समेत समस्या
भएको छ ।

डाक्टर तथा अस्पतालका कर्मचारीहरुको टोलीले जिल्ला प्रशासन कार्यालयको समेत
ध्यानाकर्षण गराएका छन् ।

जिल्ला अस्पतालका अख्तियार प्राप्त मेसु र अस्पताल व्यवस्थापन समिति अध्यक्ष सोही समस्या समाधानका लागि मन्त्रालयमा धाइरहेका छन् तर मन्त्रालय भने बैतडी अस्पतालको समस्यालाई नजरअन्दाज गर्दै बसेको आरोप व्यवस्थापन समितिको छ।