शहीद लखन गाउँपालिकाको केन्द्र जोड्ने सडक कालोपत्रे गर्न सुरु

 गोरखा- गोरखाको शहिद लखन गाऊँपालिकाको केन्द्र जोड्ने सडक कालोपत्रे गर्न थालिएको छ । नाम्जुङदेखि पालिकाको केन्द्र घैरुङसम्मको साढे ३ किलोमिटर सडक कालोपत्रे गर्न थालिएको हो ।

उक्त सडक स्तरोन्नतीका लागि २०७९ माघमा ठेक्का सम्झौता भएको थियो ।

ठेक्का सम्झौता अनुसार सडक स्तरोन्नतीको काम यो वर्षको माघमा पूरा गर्नुपर्नेछ । तर सम्झौताको म्याद अगावै स्तरोन्नतीको काम पूरा गर्ने गरि आइतबारबाट कालोपत्र शुरु गरिएको निर्माण कम्पनी सिनर्जी सचेत जेभीका भोला मरहट्टाले बताउनुभयो ।

स्तरोन्नतीका क्रममा सडकको चौडाई साडे ७ मिटर बनाइएको छ । जसमध्ये साडे ५ किलोमिटरमा कालोपत्र गरिने शहिद लखन गाऊँपालिकाका इन्जिनियर राजन रानाभाटले बताउनुभयो ।

पालिकाको आफ्नै स्रोत र संघीय सरकारको समपूरक अनुदानबाट सडबनाम्जुङदेखि घैरुङसम्मको साढे ३ किलोमिटर सडक स्तरोन्नती गर्न लागेको हो । गोरखा सदरमुकामबाट नाम्जुङसम्मको सडक भने प्रदेश सरकारको लगानीमा यसअघिनै कालोपत्रे भैसकेको छ ।

सडक स्तरोन्नतीका लागि ९ करोड ९८ लाख रुपैयाँमा ठेक्का सम्झौता भएको हो । गाऊँपालिकाको केन्द्रबाट मनकामना मन्दिरसम्मको सडकखण्ड पनि क्रमैसँग कालोपत्र गरिने गाऊँपालिकाका अध्यक्ष रमेश थापामगरले बताउनुभयो ।

उक्त सडक स्तरोन्नती भएपछि पनि शहिद लखन गाऊँपालिकाको केन्द्र पक्की सडक सञ्जालसँग जोडिन अझै करीव डेढ किलोमिटर सडक कालोपत्रे गर्नुपर्नेछ ।।