युरोकप: आज रोमानिया र नेदरल्याण्डस् तथा टर्की र अष्ट्रिया भिड्दै

काठमाडौँ- युरोकप फुटबल अन्तर्गत आज रोमानियाले नेदरल्याण्डसको सामना गर्दै छ ।

यो खेल नेपाली समय अनुसार राति ९: ४५ बजे शुरु हुनेछ ।

यसैगरी आजै राति पौने एक बजे शुरु हुने अर्को खेलमा टर्की र अष्ट्रियाबीच प्रतिस्पर्धा हुनेछ ।

नकआउट चरणको हालसम्म भएका खेलमा विजयी बनेका जर्मनी र स्पेन तथा इङ्ल्याण्ड र स्विट्जरल्याण्डबीच क्वाटरफायनल चरणमा प्रतिस्पर्धा हुने पक्का भइसकेको छ ।।

यसअघि,  पुर्व विजेता फ्रान्स र पोर्चुगल जर्मनीमा जारी युरोकप फुटबल २०२४ को क्वार्टरफाइनलमा प्रवेश गरेका छन् ।

आज विहान सम्पन्न खेलमा स्लोभेनियालाई पेनाल्टी सुटआउटमा ३–० गोलले हराउँदै पूर्वविजेता पोर्चुगल क्वार्टरफाइनलमा प्रवेश गरेको हो ।

पोर्चुगलका गोलरक्षक कोस्टाले स्लोभेनियाका खेलाडीको तीन वटा पेनाल्टी प्रहार लगातार रोकेका थिए ।

यसअघि निर्धारित समयको खेलमा पाएको पेनाल्टी रोनल्डोले मिस गरे पछी खेल गोलरहित बराबरीमा टुङ्गिएको थियो ।

पोर्चुगलले अब अन्तिम ८ मा फ्रान्सको सामना गर्नेछ । हिजो राति नै भएको पहिलो खेलमा बेल्जियमलाई १–० गोल अन्तरले हराउदै फ्रान्स क्वार्टरफाइनलमा प्रवेश गरेको हो ।

गएराति भएको खेलमा ८५ औँ मिनेटमा बेल्जियमका डिफेन्डरले विपक्षी टोलीका मुआनीको प्रहार रोक्ने क्रममा भएको आत्मघाती गोल नै निर्णयक बन्यो ।.